Read Mizo Lushai Sam 33 Bible Online

Sam 33 - Mizo Lushai bible

Sam 33

¹Mi dikte u, LALPA-ah lâwmin au ula, Mi ngîlte tân amah fak hi a âwm a ni.

²Ṭingṭang nên LALPA chu fak ula, Perhkhuang hrui sâwm nei nên a fakna hla sa rawh u.

³A tân hla thar sa ula, Thiam taka remin, hlimin au rawh u.

⁴ LALPA thu chu a dik ṭhîn a, A thiltihte a rin ngam bawk a ni.

⁵ LALPAN dikna leh rorêl ṭha a ngaina a, Lei hi a ngilneihnain a khat.

⁶Vân khi LALPA thu-a siam a ni a, Engkim mai khi a thu-a awm a ni.

⁷Tuipui tuite chu bêlah a chhêk khâwm a, Tuifinriat tuite chu zêmah a khung khâwm bawk.

⁸Leia awmten LALPA chu ṭih sela, Khawvêla chêng zawng zawngten ani chu hlau rawh se.

⁹Thu a han sawi a, khawvêl hi a lo awm ta mai a, Thu a han pe a, a awm hlen ta a ni.

¹⁰ LALPAN hnamte remruat chu a hlawhchhamtîr a, Mite thiltum chu a dâl bawk ṭhîn.

¹¹ LALPA remruatte chu chatuanin a ding a, A thiltum chu kumkhuaa awm atân a ni.

¹² LALPA Pathiana neih hnam chu an nihlawh e, A rochana a thlan, a mite chu.

¹³Vân aṭangin LALPAN a zu thlîr a, Mihring zawng zawng a hmu vek a,

¹⁴A ṭhut hmun aṭangin Leia chêng zawng zawng hi a rawn en ṭhîn.

¹⁵An rilrute chu a siamsak a ni a, An thiltihte pawh chu a hre fai vek a ni.

¹⁶Sipai ngah avâng ngawtin lal chu an him lo vang a, Mi chak pawh an chak avâng ngawtin an him hek lo vang.

¹⁷Sakawr chu inchhanhim nân a rin tlâk loh va, Chak hle mah se, tu mah a chhan chhuak thei lo.

¹⁸Amah ṭihtute chungah LALPA mit a fu, A khawngaihna nghâktute chungah chuan;

¹⁹Thihna laka chhan chhuak tûr leh, Ṭâmpui laka an nun humhim tûrin.

²⁰Keinin LALPA kan nghâk reng a, Min ṭanpuitu, kan phaw a ni.

²¹Amahah chuan kan thinlung a lâwm a, A hming thianghlim kan ring a ni.

²² LALPA, i ngilneihna kan chungah awm rawh se, Nang hi kan beisei chu i ni si a.