Read Mizo Lushai Sam 34 Bible Online

Sam 34 - Mizo Lushai bible

Sam 34

¹Eng lai pawhin LALPA chu ka fak ang a, Tâwp lo tawpin ka fak zêl ang.

² LALPA chu ka chhuang êm êm a, Retheite chuan chu chu hria se, lâwm ve rawh se.

³ LALPA chu min chawimawipui ula, A hming i tiropui ang u.

⁴ LALPA chu ka zawng a, min lo chhâng a, Ka hlauh zawng zawng lakah min chhan chhuak ta.

⁵Amah an han en a, an hmêl a hlim ta a, An zak ngai tawh lo vang.

⁶He mi rethei tak hian LALPA chu a au va, Anin a lo ngaithla a, A manganna zawng zawngah a rawn chhan chhuak ta a.

⁷Vântirhkohte chuan LALPA ṭihtute chu An hual tlat a, an humhim ṭhîn.

⁸ LALPA ṭhatzia hi tem chhin ula, Han hre chiang teh rêng u. LALPA hnêna tlulûtte chu an nihlawh e.

⁹A mi thianghlimte u, LALPA chu hlau ula, Amah ṭihtute chuan tlâkchham rêng an nei lo.

¹⁰Sakeibaknei vânglaite chuan ei tûr an tlachham a, An ril a ṭâm bawk ṭhîn. LALPA zawngtute erawh chuan thil ṭha eng mah an tlachham lo.

¹¹Naute u, lo kal ula, Ka thu ngaithla rawh u, LALPA ṭih dân ka zirtîr ang che u.

¹²Tu pawh nun thlahlela, Thil ṭha hmua dam rei duh chuan,

¹³Sual lakah chuan a lei vêng ṭha sela, Bumna thu sawi lo tûrin fîmkhur rawh se.

¹⁴Sual hawisan la, thil ṭha ti rawh, Remna zawng la, ûm zêl ang che.

¹⁵Mi dikte chu LALPAN a en reng a, Ṭanpui dîla an au a ngaithla ṭhîn.

¹⁶Thil sual titute chu LALPAN a lawm loh avângin Leiah pawh hriat reng an ni lo vang.

¹⁷Mi dikte chuan LALPA an au va, anin a lo hria a, An manganna zawng zawngah a chhan chhuak a.

¹⁸Thinlung taka lungchhiate chu LALPAN a hnaih ṭhîn a, Rilru taka inchhîrte chu a chhandam ṭhîn.

¹⁹Mi dik chuan thil ṭha lo tam tak a tuar ṭhîn a, Mahse, chûng zawng zawng ata chu LALPAN a chhan chhuak ṭhîn.

²⁰A ruh zawng zawng a vênsak a, Pakhat mah tihtliah a ni lo.

²¹Mi sualte chu thil ṭha lovin a tihlum ang a, Mi dik hawtute chuan thiam loh an chang bawk ang.

²² LALPAN a chhiahhlawhte a tlan ta a, Amah pantu apiangte chuan thiam loh an chang lo vang.