Read Mizo Lushai Sam 35 Bible Online

Sam 35 - Mizo Lushai bible

Sam 35

¹ LALPA, nangin min beitutebei la, Min dotute do ve ang che.

²I phaw kengin i âwmphaw pawh ha la, Min pui tûrin lo thawk ang che.

³I fei lekin i khandaih chu phawi la, Min ûmtute lo dang tlat la, “Ka chhan him dâwn a che,” min ti ang che.

⁴Min thah tumtute chu tihmualphova tihzahin awm sela, Min tihchhiat tumtute chu tlânchhiain, hrilhhai takin awm zâwk rawh se.

⁵Buhsi, thli lên angin, LALPA vântirhkohvin anni chu ûm bo rawh se,

⁶Thim zînga kawng nâlah LALPA vântirhkohvin ûm nek rawh se.

⁷A chhan awm lovin ka awh nân lên an zâr ru a, Ka tlâk nân khur an lai.

⁸An hriat loh hlânin chhiatna an chungah thleng se, An thang kam rûkah anni chu âwk sela, An khur laihah tla hlawm rawh se.

⁹ LALPA-ah chuan ka lâwm ang a, Min chhandam avângin ka hlim bawk ang.

¹⁰Ka thinlung zawng zawngin LALPA hnênah, “Nang chuan an aia thiltithei lakah retheite i chhan ṭhîn, Pachhiate leh chanhaite pawh an neih lâksaktute lakah i hum bawk ṭhîn, Nang ang rêng hi tu nge awm le?” ka ti ngei ang.

¹¹Hretu derte an lo thawk a, Ka hriat loh thilahte min chhâl.

¹²Ka thil ṭha tih sualin min thungrûl a, Ka bei a dawng a ni.

¹³Kei chuan an dam lohvin Saiip puan ka sin a, Chaw ngheiin ka tuarpui a, Lu kûn rengin ka ṭawngṭai ṭhîn.

¹⁴Ka ṭhian emaw, ka unaupa emaw tuarpui angin Ka vei ka vei ṭhîn a, Mahni nu sûn ni awm takin ka kun reng ṭhîn.

¹⁵Nimahsela, kei ka tlûk chuan hlimin an pung khâwm a, Min sawisa tûrin, ka hriat ngai lohte pawh An lo pung khâwm bawk a, Min sawisak an bâng duh lo.

¹⁶Piangsualte pawh hmusit duh ṭhîn mi sualte chuan An hâ min ṭhial khum hi.

¹⁷ LALPA, eng chen nge min en mai mai dâwn le? Min tichhe tûrte lakah min rawn chhan la, Hêng sakeibakneite lakah hian ka nunna hi chhanhim ang che.

¹⁸Pungkhâwm ropui tak hmaah lâwmthu ka hrilh ang che a, Mi tam tak zîngah chuan ka fak ang che.

¹⁹Dik lo taka min hmêlmâktute chu, Ka chungah lâwm suh se; Engmahlova min hawtute chu ka chungah hian meng sâng suh se

²⁰Nêlawm takin an ṭawng ngai lo va, Khualehtui ṭhate bum dân tûr an ngaihtuah ṭhîn.

²¹Min bei tûrin an ka an âng a, “I hi! Kan mit ngeiin kan hmu ta alâwm,” an ti.

²² LALPA, i hmu reng a, ngawi mai teh suh; LALPA, min hlat lul suh ang che.

²³Tho la, min chhan tûrin lo thawk ta che, LALPA ka Pathian, min chhanhim teh.

²⁴ LALPA Pathian, i dikzia tilang tûrin ro min rêlsak la, Min diriam lul suh se.

²⁵Anni chuan, “Kan duhthusâm a thleng ta le!” ti rilruin “Kan lem zo ta alâwm,” ti hek suh se.

²⁶Ka chan chhiat laia lâwm ṭhînte chu Zakin mualpho rawh se; Ka chunga intilalte chu Zak ngawih ngawihin kun reng rawh se.

²⁷Ka thiamchannaa lâwmte chu hlim takin awm sela; “LALPA chu a ropui e, A chhiahhlawh chan ṭha duhsaktu chu,” ti rawh se.

²⁸Tichuan, i dikzia hi ka hril ang a, Nilêngin ka fak ang che.