Read Mizo Lushai Sam 37 Bible Online

Sam 37 - Mizo Lushai bible

Sam 37

¹Mi sualte avângin intihrehawm suh la, An thil dik lo tihte awt bawk hek suh.

²Hlobet angin an vuai ang a, Hnimhring angin an ro mai dâwn si.

³ LALPA ring la, thil ṭha ti rawh, He ramah hian awm la, A hausakna tlân rawh.

⁴ LALPA chu nêl la, I dîl apiang a pe ang che.

⁵I awm dân tûr chu LALPA chungah nghat la, Amah ring la, a tihsak vek ang che.

⁶I dikna chu ni angin a êntîr ang a, I rorêlna dik pawh chhûn êng ang a ni ang.

⁷ LALPA-ah chuan châwl la, Amah chu nghâk fan fan rawh. Hausa thutte awt suh ang che, Thil sual titute thîk hek suh.

⁸Thinrim bân la, thinur sim rawh, Intihrehawm duh suh, thil sual i tih phah dah ang e.

⁹Mi sualte chu hnawh chhuah an ni ang a, LALPA nghâktute erawh chuan ram hi an chang ang.

¹⁰Rei lo têah mi sualte chu an bo ta phiar a, An awmna chu en en mah la, i hmu zo lo vang.

¹¹Thuhnuairawlhte chuan ram hi an rochung ang a. Râlmuang takin an awm hle hle bawk ang.

¹²Mi sualte chuan mi dik an phiar ṭhîn a, Thinurin an hâ an ṭhial khum ṭhîn.

¹³ LALPAN anni chu a nuihzat ang a, An thi mai dâwn tih a hre vek si.

¹⁴Retheite leh pachhiate tihchhiat nân, Mi suaksual chuan ngûnhnâm an phawi ṭhîn a, Mi ngîlte tihhlum nân, An thalngul chu an kai kûl ṭhîn.

¹⁵An ngûnhnâm chuan anmahni zâwk chu a chhun ang a, An thalngul pawh a tliak vek ang.

¹⁶Mi dik thil neih chu tlêm mah se, Mi sual thil neih ṭeuhte ai chuan a ṭha.

¹⁷Mi sualte chakna chu LALPAN a lâk bosak ang a, Mi dikte chu a hum tlat ang.

¹⁸Mi nun tluangte chu LALPAN a en zui a, An rochan chu an nei kumkhua tawh ang.

¹⁹Hun harsaah an mualpho lo vang a, Ṭâm kumah pawh an puar bawk ang.

²⁰Mi sualte chu an boral thuai ang a, LALPA hmêlmate pawh inthawina berâm thau angin meikhu-ah an zâm ral ang.

²¹Mi sualte chuan an pûkin an pe leh ngai lo va, Mi ṭhate erawh chuan a thlâwnin an pe ṭhîn.

²²Mal a sâwmte chuan ram hi an luah ang a, Ânchhia a lawhte chu an boral ang.

²³An kalna tûr LALPAN a ruatsak a, An nun dânah a lâwm bawk ṭhîn.

²⁴Tlu ṭhîn mah se, an tlu hlen lo vang, LALPAN an kut a chelh zui ṭhîn a ni.

²⁵Ka naupan lai ata ka lo tar hnu thleng hian, LALPAN mi dik a thlahthlam tâk ka hre ngai lo, An fate pawh chaw khawn ka hmu hek lo.

²⁶Ni tin a thlâwnin an pe a, an pûktîr ṭhîn, An fate chuan malsâwmna pawh an dawng zêl bawk.

²⁷Sual hawisanin thil ṭha ti la, He ramah hian i chêng kumkhua dâwn nia.

²⁸Dik taka rorêl hi LALPAN a ngaina a, Amah ṭihtute chu a ensan ngai hek lo. A vêng kumkhua ang a, Mi suaksual thlahte erawh chu an boral ang.

²⁹Mi dikte chuan ram hi an nei ang a, An awmchilh kumkhua ang.

³⁰Mi dik chuan thufing a chhâk chhuak a, Dik takin ro a rêl bawk ṭhîn.

³¹Pathian dân chu a thinlungah a châm tlat a, A pênsan ngai hek lo.

³²Mi suaksual chuan mi dik a châng ru a, Tihhlum dân kawng a zawng reng ṭhîn.

³³Mahse, LALPAN mi sual kutah a hnutchhiah duh lo va, Rorêlnaah thiam loh an chan a phal hek lo.

³⁴ LALPA chu thlîr reng la, a kawng zawh rawh. A chawimawi ang chia, ram chu a pe ang che a, Mi sualte boral lai i hmu bawk ang.

³⁵Mi sual inchhek lai ka hmu a, Lei ṭhaa thing angin a duah hluah mai.

³⁶Ka tlawh leh chuan a lo awm tawh lo va, Ka va zawng a, hmuh tûr a awm tawh lo.

³⁷Mi ṭhate awm dân chu ngaihtuah ula, Mi ngîlte chu en teh mah u, Remna duh mite chuan tu leh fa an nei ṭhîn.

³⁸Thil sual titute erawh chu an ral tlâng ang a, An zîk a bûl bawk ang.

³⁹Mi dikte chu LALPAN a rawn chhandam ṭhîn a, Mangan ni chuan an himna kulh a ni.

⁴⁰ LALPAN a pui ṭhîn a, a chhan chhuak ṭhîn, Mi sual lakah a hum tlat a, A hnêna an tlûkluh avângin a chhandam ṭhîn.