Read Mizo Lushai Sam 38 Bible Online

Sam 38 - Mizo Lushai bible

Sam 38

¹ LALPA, thinrim chungin min zilh suh la, Thinur chungin min hrem hek suh.

²I thal chuan min chhun a, I kut ka tuar tâk hi.

³I lungnih loh avângin ka taksaah dam lai rêng a awm lo va, Ka sual avângin ka na ṭhêm ṭhûm a ni.

⁴Ka khawlohnain mi chîm pil a, Phurh rual lohvin a rit a ni.

⁵Ka hliamte chu a pân pûn a, Ka lo â êm a ni.

⁶Na tuarin ka kun tlawk tlawk ṭhîn a, Nilêngin ka mangang chu ka vân ruai ṭhîn.

⁷Ka taiah hian a sa huai huai ṭhîn a, Ka taksaah dam lai rêng a awm lo.

⁸Ka â chuai a, ka sil ûrh a, Thinlung nâin ka rûm ka rûm ṭhîn a ni.

⁹ LALPA, ka duhzâwng chu ka rawn thlen e, Ka rûm thâwm pawh i hai hek lo.

¹⁰Ka phu dêp dêp ṭhîn a, tha rêng ka nei ta lo, Ka mitte pawh a thim zo ta.

¹¹Ka pân avângin ka ṭhen leh rualte chuan min hnaih duh lo va; Ka laichînte pawh an hla zo ta.

¹²Min thah tumtute chuan ka tân thang an kam a, Ka chhiatna zawngtute chuan min vau reng a, Eng lai pawhin min phiar ru ṭhîn.

¹³Bengngawng angin eng mah ka hre ṭhîn lo va, Ṭawngtheilo ang maiin eng mah ka sawi ngai lo.

¹⁴Eng mah hre thei lote chuan Tu mah an chhâng ngai lo ang hian ka awm.

¹⁵A ni, LALPA, nangmah ka nghâk che a, LALPA, min chhâng ang che, aw ka Pathian.

¹⁶Ka tawlhthlûkin min diriam anga, An lâwm viau dah ang e, ka ti a ni.

¹⁷Ka chau lek lek a ni, Ka tuar reng si a.

¹⁸Ka bawhchhiatna ka zêp lo ve, Ka sual avângin ka mang a ang si a.

¹⁹Ka hmêlmate chu an thothâng a ṭhain an chak hle a, Dik lo taka min hawtute an pung tulh tulh,

²⁰Thil ṭha suala thungrûltuten Thil ṭha ka tih ṭhin avângin min er,

²¹ LALPA, min kalsan suh, Aw ka Pathian, min hlat lul suh.

²²Min pui tûrin lo hmanhmawh rawh, LALPA, min chhandamtu.