Read Mizo Lushai Sam 39 Bible Online

Sam 39 - Mizo Lushai bible

Sam 39

¹‘Ka kalna tûr ka en ngun ang, Thu sual ka sawi loh nân, Mi sual bulah ka hmui Ka chîp tlat ang,’ ka ti a ni.

²Ka ngawi reng a, eng mah ka sawi lo va, A ṭha lam pawh ka sawi hek lo, Ka tuarna chu a zual tulh tulh bawk si.

³Ka thinlung a sahâl a, Ka inngaihtuah nasat poh leh ka buai a zual, Tichuan, ka ṭawng chhuak ta hial a:

⁴ LALPA, ka tâwpna tûr min hriattîr ang che, Ka dam chin tûr nên, ka nun tawizia ka hriat theih nân.

⁵Ngai teh, kan dam chhûng nite chu i va han titawi êm! Kan hunte hi i tân eng tham mah a ni lo, Mi tin an ṭhat lai ber pawhin eng an ni lo.

⁶Hlimthla ang chauh an ni; An buaipui ber pawh engmahlo mai a ni.

⁷ LALPA, beisei tûr eng dang nge ka neih? Nang hi i ni ka rinchhan ber chu.

⁸Ka sual zawng zawng ata min chhan chhuak la, Mi â-te nuihzatbûrah min siam lul suh.

⁹Nangin min tuartîr a nih avângin, Ka ngawi mai a, ka ṭawng hek lo.

¹⁰Min hrem tawh suh, I kut tuarin ka thi mai dâwn alâwm.

¹¹An sualnaah mihringte chu i zilh a, i thunun ṭhîn, Thîm ei angin an mawinate i tichhe ṭhîn. Mihring hi zawng eng mah an lo ni lo.

¹² LALPA, ka ṭawngṭai hi lo ngaithla la, Ṭanpui ka dîlna hi lo hria ang che. Ka mittui hi ngawihsan suh la, Kan pi leh pute ang khân, Rei lo tê châm, mikhual mai ka nih hi.

¹³Ka kal bova ka awm loh hlen hma hian. Ka hlimna tûr hun min siamsak ang che.