Read Mizo Lushai Sam 40 Bible Online

Sam 40 - Mizo Lushai bible

Sam 40

¹ LALPA chu ka nghâk fan fan a, Min ngaihven a, ṭanpui ka dîlna chu a ngaithla ta.

²Khuarkhurum chirhdûp thûk ata min khai chhuak a, Lungpui chungah min dintîr a, Hmun nghetah chuan min awmtîr ta.

³Hla thar min saktîr a, kan Pathian fakna hla chu, Mi tam takin an hmu ang a, an hlau vang a, LALPA chu an ring ang.

⁴Mi nihlawhte chu LALPA ringtute hi an ni, Milem be duh lova, Pathian lem lam Hawi duh ngai lote chu.

⁵Aw LALPA, kan Pathian, kan tân thil tam tak i ti a, Thil mak tak tak tiin min ngaihtuah êm êm ṭhîn a ni. Nangmah ang rêng tu mah an awm lo va, Chhiarin hril dâwn ila, Hril sên rual a ni lo.

⁶Inthawina leh hâlral thilhlan i ngaisâng lo va, Sual thawina leh pum hâl i phût hek lo, I thu ka hriat theih nân beng min pe ta zâwk a.

⁷Tichuan, “Hei le, ka rawn pan che; Dân bu-ah chuan i zirtîrna Ka tân ziak a ni e,” ka ti a.

⁸Aw ka Pathian, i duhzâwng tih ka va châk êm! I dânte chu ka thinlungah a châm reng ṭhîn a ni.

⁹Min chhan chhuah thu lâwmawm hi, Pungkhâwm ropui zîngah ka hril ṭhîn a, LALPA, nangmah ngeiin i hria, Ka kâ hi ka ui ngai lo.

¹⁰Min chhan chhuah thu hi ka thup lo va, I rinawmna leh i chhandamna thu hi Ka hril fo ṭhîn. Pungkhâwm ropui zîngah, I ngilneihna leh i rin tlâkzia ka zêp ngai lo.

¹¹ LALPA, i lainatna ka tân ui suh, I ngilneihna leh i rinawmna chuan min hualhim fo vang che.

¹²Thil ṭha lo chhiar sên lohte chuan min hual tlat a, Ka bawhchhiatnate chuan min chîm ta a, Ka chhiar sêng lo, Ka sam aiin a tam zâwk a, Ka bei a dawng ta a.

¹³ LALPA, khawngaih takin min chhan chhuak la, LALPA, min rawn ṭanpui var rawh.

¹⁴Min thah tumtute chu Mualphovin, mangang hle hlawm rawh se. Ka chhiatna chunga lâwmte chu Zak takin tlânchhe rawh se.

¹⁵“Chei! Chei!” min tihkhumtute chu Zakin kun tlawk tlawk bawk rawh se.

¹⁶Nangmah zawngtu zawng zawngte chu, Hlimin au dur dur sela, I chhandamna ngaihlute chuan, “LALPA chawimawi rawh u,” ti fo rawh se.

¹⁷Kei pachhia leh rethei tak hi, LALPAN min ngaihtuah ṭhîn; Min puitu leh min chhandamtu i ni, Aw ka Pathian, muangchâng lul suh.