Read Mizo Lushai Sam 41 Bible Online

Sam 41 - Mizo Lushai bible

Sam 41

¹Mi rethei ngaihtuahtutechu an nihlawh e, Mangan ni-ah LALPAN a chhanhim dâwn si a.

² LALPAN a vêng ang a, an dam reng ang, An ramah chuan engthâwl takin an awm ang a, An hmêlmate kutah a pe lo vang.

³ LALPAN an dam lohvin a enkawl ang a, An natna a tidam ang.

⁴Kei chuan, “LALPA, i chungah thil ka tisual a, Min khawngaih la, min tidam rawh,” ka ti a.

⁵Ka hmêlmaten na tak takin min ṭawng khum a, “Engtikah tak thi-in boral ang maw,” an ti ṭhîn.

⁶Min tlawh lahin a chhe zâwngin an sawi chhâwng a, A chhe lam hlîr an la khâwm, An kal chhuak a, an sawi darh ṭhîn.

⁷Min hawtute an inbe ru ṭhîn a, Ka chhiatna tûr hlîr an ngaihtuah ṭhîn.

⁸“A na êm a, A thokâng leh tawh lo vang,” an ti a.

⁹Ka ṭhian bul ber, ka rin êm êm, Ka chaw kîlpui ngei chu Ka chungah a inlek ta.

¹⁰ LALPA, nang chuan min khawngaih la, min tidam leh ang che, Ka hmêlmate hi ka han thungrûl teh ang.

¹¹Ka hmêlmaten min hneh loh chuan, Min duhsak hle tih ka hria ang.

¹²Ka dik avângin nangin min chelh tlat la, I hmaah chuan min awmtîr kumkhua ang che.

¹³ LALPA, Israel-te Pathian chu fak rawh u, Chatuan chatuanin amah chu fak rawh u. Amen, Amen.