Read Mizo Lushai Sam 42 Bible Online

Sam 42 - Mizo Lushai bible

Sam 42

¹Sakhiin luite tui a châk êm êm ṭhîn ang hian, Aw Pathian, kei pawhin ka ngai êm êm ṭhîn che a ni.

²Ka nun hi Pathian châkin, Pathian nung châkin a tuihâl a ni. Pathian hmaa kalin engtikah nge ka inlan ang?

³Ka mittui avângin chaw rêng ka ei thei lo, Ka hmêlmate lah chuan, “Khawiah nge i Pathian chu?” min lo ti chhên a.

⁴Tûn hma ka ngaihtuahin ka lung a chhe hle ṭhîn, Pathian in pana mipui ka hruai ṭhin te, Hlim taka fak hla saa kan kût ṭhin laite kha:

⁵Engtizia nge ka ngui êma, Ka rilru a hah tâk êm le? Pathianah chuan ka innghat ang a, Min chhandamtu hmêl chu hmuin ka la fak ang.

⁶Aw Pathian, ka rilru a ngui hle mai, Hermon tlâng te, Mizar tlâng te, Jordan ram aṭangte hian ka hre reng ṭhîn a che.

⁷I tui luang ri hum hum angin, Tui thûk takte chu a phûl bulh bulh mai a, I tuifâwn inchhawkte chuan min tuam tâk hi.

⁸ LALPAN a ngilneihna chu chhûnah a tilang a, Zânah a fak hlain min awi. Mi tinungtu Pathian hnênah ka ṭawngṭai ang.

⁹Pathian, ka lungpui hnênah, “Engati nge min thlahthlama, Ka hmêlmate kut tuara ka rûm le?” ka la ti ang.

¹⁰Ruh vuak sawmsak ang maia nain Ka hmêlmaten min diriam a, “Khawiah nge i Pathian chu?” Min lo ti chhên bawk si.

¹¹Engtizia nge ka ngui êma, Ka rilru a hah tâk êm le? Pathianah chuan ka innghat ang a, Min chhandamtu hmêl chu hmuin ka la fak ang.