Read Mizo Lushai Sam 44 Bible Online

Sam 44 - Mizo Lushai bible

Sam 44

¹Aw Pathian, hmasânga anhun laia i thiltihte, Kan pi puten min hrilh a, Kan bengin kan hria.

²I kutin hnam dangte chu i hnawt chhuak a, An hmunah anni chu i phun a, Mi dangte chu i tidarh a, Anni chu i tipung ta a.

³Ram chu khandaiha an lâk a ni lo va, An chak avânga inhumhim an ni hek lo; I kut ding lam, i bân pharin i awmpui a, I duhsak êm avânga la an ni zâwk si.

⁴Aw Pathian, nang zawng ka Lal i ni, Jakob-ho, an dote hnehtîr ṭhîntu chu.

⁵Nangmah avângin min dotute kan nawr tawm a, I hming avângin min beitute kan chîl nek ṭhîn.

⁶Ka thal ka ring lo va, Ka khandaih hian mi chhan hek lo.

⁷Ka hmêlmate lakah nangin min chhanhim ṭhîn a, Min hawtute i timualpho bawk ṭhîn.

⁸Ni tin Pathian kan chawimawi a, I hming kan fak kumkhua bawk ang.

⁹Tûnah hi zawng min thlauthla ta, Min timualpho ta a, Kan sipai rual zîngah i tel ve tâk loh hi.

¹⁰Min dotute hmaah min tlânchhiattîr ta a, Min hawtuten min rawk tâk hi.

¹¹Berâm anga talhah min dah a, Hnam tin zîngah min tihdarh hi.

¹²I mite chu tlâwm takin i hralh a, An man lah chu i phût sâng duh hek lo.

¹³Kan kianga awmte hmuhsitah min siam ta a, Kan vêla chêngte diriam leh nuihzat kan ni.

¹⁴Hnam dangte chuan fiamthu nuihzaah min hmang a, An lu min thin khum ṭhîn.

¹⁵Ni tin mualpho takin kan awm ṭhîn a, Zakin kan kûn reng mai;

¹⁶Min sâwta min diriamtute aw avâng leh Hmêlma leh phuba latute avângin.

¹⁷Hêng hi lo thleng mah se kan theihnghilh lo che a, I thuthlung pawh kan bawhchhe lo.

¹⁸Kan hawisan ngai lo che a, I kawng ata kan pêng hek lo.

¹⁹Sihal chênna hmunah min lum reng a, Thim chhah takin min khuh ta a.

²⁰Kan Pathian hming kan theihnghilha, Kan kutte hi hnam dang pathian lama kan phar ṭhin chuan,

²¹Rilru ngaihtuah rûkte hre theitu, Chung Pathian chuan a hre lo vang maw?

²²Nangmah avângin ni tin min that reng a, Berâm talh tûr dah khâwm ang lekin min ngai a ni.

²³ LALPA, tho teh, engtizia nge i muthilh reng? Intiharh la, min ngaihsak lo reng suh.

²⁴Engati nge min bihrûksana, Ka tuar nasatzia leh min tihduhdahzia hi i theihnghilh le?

²⁵Lei siin kan kûn renga, Kan bawh phêk reng hi.

²⁶Min pui tûrin lo thawk chhuak la, Ngil i neih êm avângin min tlan ang che.