Read Mizo Lushai Sam 45 Bible Online

Sam 45 - Mizo Lushai bible

Sam 45

¹Thu mawi tak tak ka rilruah a lang uar uar a, Lal chungchâng thu ka hril dâwn e. Rang taka lehkha an ziak angin Ka sawi zung zung dâwn e.

²Mi azawngah i hmêl a ṭha ber e, I ṭawngkam lah a duhawm si, Chuvângin, Pathian pawhin mal a sâwm che hi.

³Aw mi huaisen, i khandaih chu pai la, Ropui leh mawi takin inthuam rawh le.

⁴Ropui taka inthuama, Thutak leh dikna ṭan tûrin Sakawr chunga chuangin tluang takin kal la, I chaknain hneh zêl ang che.

⁵I thalte chu a zum êm êm, I hmêlmate a chhun tlang a, I hmaah chuan mite an tlu phung mai.

⁶Pathian pêk che i lalna chu I nei reng ang a, I mite chungah diknain ro i rêl ang.

⁷Dikna i ngainata, sualna i huat avângin, Pathian, i Pathian chuan a thlang ta che a ni; Lal dangte aia nasa zâwkin hlimna hriak chu a thih ta che.

⁸I silhfênah Mura leh Aloe rim, Thakthîng rim nên a nam rum rum, Sainghova chei in ropui tak aṭangin Ṭingṭang tumtuten an awi che.

⁹I kianga ding ṭhîn tûra thlante chu lal fanute an ni, I ding lamah, Ofir rangkachak puan sinin lalnu a ding.

¹⁰Mami, ka thu hi ngaithla la, I beng chhiin ngaihven ang che: I laichînte leh i pa in chu theihnghilh daih rawh.

¹¹Tichuan, lalin hmêlṭha tiin a duh ang che a, Ani chu i LALPA a ni si a, a thu zâwm rawh.

¹²Tura khuaa mi hausaten an tlawn ang che a, Thilpêk an rawn hlân dâwn a che.

¹³A pindana lal nula ṭhu chu a va ṭha êm! Rangkachak zaia ṭial puan a sin saw.

¹⁴Mawi taka incheiin lal hnênah an hruai, Amah zuitu nula rualte nên, I hnênah an rawn hruai e.

¹⁵Hlim leh lâwmin an rawn hruai a, Lal inah chuan an lo lawi e.

¹⁶I pate hmun chu i faten an luah ang a, Ram tina rorêltuah i siam bawk ang.

¹⁷I hming hi chhuan zawng zawnga hriat reng tûrin ka siam ang a, Tichuan, miten an fak kumkhua ang che.