Read Mizo Lushai Sam 49 Bible Online

Sam 49 - Mizo Lushai bible

Sam 49

¹Mi tinrêngin hei hi ngaithla ula, Khawvêla chêng zawng zawngten in beng lo chhi rawh u,

²Mitê leh milian, Hausa leh rethei, in zavaiin,

³Thufing ka chhâk chhuak dâwn e, Ka ngaihtuah ṭhinte chu ka tilang dâwn.

⁴Thu ril ka ngaihven ang a, Ṭingṭang tumin thu khirh ka sawi fiah ang.

⁵Hun ṭha lo chu engah nge ka hlauh vang? Min beitute sualna chuan min hual mah se.

⁶Chûng mite chuan an hausakna ringin An sum ngahzia an chhuang a ni.

⁷Tu mah mahni an intlan thei lo asin: Pathian hnênah intlanna man an pe thei hek lo.

⁸Mihring nunna man chu a tam êm a, Eng mahin a daih lo vang.

⁹Thlâna liam lova, An dam reng theih nân chuan.

¹⁰Mi fingte pawh an thi a hmu, Mi â te leh mi mâwlte ang bawkin, An sumte chu mi dang tân an hnutchhiah.

¹¹An inte chu awm reng tûrin an ngai, An chênna chu kumkhaw daih tûr emaw an ti. An ram hmingah an hming an chawi.

¹²Mihring hi a hlu reng lo, Ramsa, boral mai tûr ang hi a ni.

¹³Mi â-te awm dân chu hetiang hi a ni e, An hnung zuia, an thu lâwmtute pawh:

¹⁴Berâm anga thi tûr an ni, Anmahni vêngtu chu Thihna a ni, Zîngah mi dikte chuan an chungah ro an rêl ang a, An taksa chu thlânah a ral ang, Seol-ah an awm dâwn tawh si a.

¹⁵Kei erawh chu, mitthi khua ata, Pathianin min tlan chhuak dâwn a ni.

¹⁶Mi an hlâwkin awt suh, An chhûngkaw sum a pun thûr thûrte hian,

¹⁷An thih hun chuan chhawm theih rêng an nei lo vang, An sum neih chuan a zui dâwn lo.

¹⁸An dam laiin nihlawh an inti hle ṭhîn a, An chêt fuhin miten an fak bawk ṭhîn.

¹⁹An pate kalnaah an chhuk ve tho vang, Êng awm lohna hmun thimah chuan.

²⁰Mihring hlutna hi ramsa boral ṭhîn ang mai a nihzia An hrethiam thei lo.