Read Mizo Lushai Sam 5 Bible Online

Sam 5 - Mizo Lushai bible

Sam 5

¹Aw LALPA, ka thu hi lo ngaithla la, Ka rûm thâwm hi lo hria ang che.

²Ka Lal leh ka Pathian, Ka mangang authâwm hi min ngaihthlâksak ang che. I hnêna ṭawngṭai ka ni si a.

³Aw LALPA, zîng takah ka aw i lo hria ang a, Min lo ngaithla ṭhîn ang che. Zîng aṭangin ka ṭawngṭai ṭhîn a, Nghâkhlel takin ka lo thlîr ṭhîn che.

⁴Sualnaa lâwm ṭhîn Pathian i ni lo va, I bulah chuan thil sual a leng hek lo.

⁵Inchhuangte chu i hmaah an ding thei lo vang a, Thil sual titute chu i huatzâwng an ni si.

⁶Dâwt sawi chîngte tiboral la, Tualthat leh bum chîngte chu, LALPA tenzâwng tak an ni.

⁷Kei zawng i ngilneih êm vângin I inah hian ka lo lût a, Aw LALPA, i tempul thianghlimah, Nangmah ṭih chungin ka lo kûn e.

⁸Aw LALPA, min beitute avângin, I felnaah min hruai la, I kawngte chu ka tân titluang ang che.

⁹Thutak rêng an sawi ngai lo va, An thinlung chu mi tihchhiat duhnain a khat a; An hrawk chu thlân inhawng a ni a, An kâin mi an fak der ṭhîn.

¹⁰Aw Pathian, anniho hi hrem la, An remruat chu chhiat phah rawh se; An bawhchhiatna tam tak avângin paih daih ang che, I lakah hian an hel ta si a.

¹¹Nangmah bêltute erawh chu an hlim ang a, Lâwmin an au kumkhua dâwn si; Anmahni chu i hum ang a, I hming ngainatute chuan an chhuang ang che.

¹²Aw LALPA, mi dikte chu mal i sâwm ṭhîn a, Phaw ang maiin duhsakna chuan i hual vêl ṭhîn.