Read Mizo Lushai Sam 50 Bible Online

Sam 50 - Mizo Lushai bible

Sam 50

¹ LALPA, pathiante Pathian chuan thu a sawi a, Ni lo chhuahna aṭanga a tlâk lehna thlengin Leilung hi a ko va.

²Khaw mawi famkim Zion aṭang chuan Pathian a êng chhuak ta.

³Kan Pathian chu a lo kal ang a, a ngawi mai mai dâwn lo, Meialh hluah hluahin a hma a hruai ang a, A vêlah chuan thlipui a tleh hum hum ang.

⁴Chung lam vân khi a ko, lei nên, A mite tân ro a rêl dâwn a ni.

⁵“Pathian ngaihsakte chu ko khâwm ula, Inthawina hlâna thu min thlunpuitute chu,” a ti.

⁶Vân khian a dikzia chu a puang a, Pathian ngei hi rorêltu chu a ni.

⁷“Ka mite u, ngaithla ula, thu ka sawi dâwn, Israel mite u, ka khing dâwn che u a ni, Pathian, in Pathian chu ka nih hi.

⁸Inthawina avângin ka dem lo che u a, Hâlral thil hlan in rawn lâk fo avâng hian ka dem hek lo a che u,

⁹In ina mi bâwngpa ka phût lo va, In ran huanga mi kêlpa pawh ka ngên hek lo.

¹⁰Ramhnuaia sa tinrêng hi ka ta asin, Tlâng tina chêng ramsate pawh ka ta a ni.

¹¹Tlânga sava tinrêngte pawh ka hria a, Thil nung zawng zawng pawh ka ta a ni.

¹²Rilṭâm mah ila, ka hrilh lo vang che u, Khawvêl leh a chhûnga awmte hi ka ta a ni si a.

¹³Bâwngpa sa ka eiin Kêlpa thisen ka in dâwn em ni?

¹⁴Pathian hnênah lâwmthu sawi inthawina hlân ula, Chungnungbera hnêna in thutiam chu hlen zâwk rawh u.

¹⁵Mangan ni-ah min ko ula, Ka chhanhim ngei ang che u, Tichuan, min chawimawi ang.

¹⁶Mi sual hnêna Pathian thu sawi chu hei hi a ni: “Ka dânte chu engah nge i lam chhêna, Ka thuthlung pawh engah nge i sawi fo?

¹⁷Ka thununna i duh lo va, Ka thupêkte i hnâwl bawk a.

¹⁸Rûkru i hmuhin i thurualpui a, Uire chîngte i kawp bawk ṭhîn.

¹⁹Thil sual sawi pawh i chîng hle a, Dâwt sawi i hreh hek lo.

²⁰Mi zîngah i unau rêl i chîng a, I pianpui ngei i hêk bawk ṭhîn.

²¹Hêng thilte hi tih i chîng a, Ka ngawi mai dâwn em ni? Nangmah ang leka mi ngai hi ka dem che a, A chhan pawh i mit hmuhah ka tilang dâwn a ni.

²²Pathian theihnghilhtute u, ngaithla rawh u, Chutilo chu, ka pawt sawm hlauh dah ang che u, Chhanhimtu rêng in nei lo vang.

²³Lâwmthu sawi inthawina hlântu chuan min chawimawi a ni. A awm dân vawng diktu chu, Pathian chhandamna chu ka hmuhtîr ang,” a ti a ni.