Read Mizo Lushai Sam 55 Bible Online

Sam 55 - Mizo Lushai bible

Sam 55

¹Aw Pathian, ka ṭawngṭaina ngaithla la, Khawngaih ka dîl a che, min bihrûksan lul suh.

²Mi ngaihven la, min chhâng ang che, Manganga vân ruaiin ka rûm ka rûm a ni:

³Ka hmêlmate thâwm avâng leh Mi suaksualte min nêkchêpna avângin. Min tibuai ta si a, An thinur a, min hua a ni.

⁴Ka thin a phu dêp dêp a, Thih ka hlau reng a ni.

⁵Ka thauvah min man a, ka khûr zawih zawih ta a, Ka chechâng thei ta lo.

⁶“Ṭhuro angin thla nei ila, Hahchawlhna tûr zawngin ka thlâwk daih ang.

⁷Ram hla takah ka thlâwk ang a, Thlalêr hmunah ka awm daih ang.

⁸Thlipui ruahpui laka himna panin ka kal sawk sawk tûr,” ka ti.

⁹ LALPA, an ṭawng tihbuaisak rawh, Khawpuiah hian khawlohna leh innghirnghona, Ka hmu ṭeuh si.

¹⁰Chhûn zân zawmin an vâk vêl a, Kulh vêngtute zîngah bawhchhiatna leh buaina a khat.

¹¹Khawpui chhûngah suahsualna a tam a, Kawtthlêr zau laiah lah inpâwngnêkna leh Inbumnate a reh hek lo.

¹²Ka hmêlmaten min nuihzat chu ni se, Ka tuar thiam ang. Min hawtute ka chunga inlek chu ni se, Ka bihrûksan thei ang.

¹³Mahse, nangmah i lo ni reng si a, Keimah ang maia ka ngaih, ka ṭhian ka kawmngeih tak,

¹⁴Tui taka ka titipui ṭhin, Mipui ruala Pathian ina ka lawipui ṭhin kha.

¹⁵Hmêlmate chu a hun hmain thi se, A nung chungin Seol-ah chhuk rawh se. An inah leh an zîngah chuan sualna a châm tlat si.

¹⁶Kei erawh chuan Pathian ka au vang a, LALPAN min chhandam ang.

¹⁷Tûk tin, tlai tin, chhûn laiah pawh, Ka chau rûm thâwm a thleng chho va, Ka aw a hre ngei ang.

¹⁸Min beitute lakah min chhanhim a, An tam hle chungin.

¹⁹Hmasâng ata rorêltu Pathian chuan, A hria ang a, a titlâwm ang, An lamlêt duh lo va, Pathian an ṭih hek lo.

²⁰Inrem taka a awmpui chungah chuan A kut a thawh ṭhîn a, An thuthlun chu a bawhchhe ṭhîn.

²¹Hnutetui ang maiin a kam chhuak chu a thlum a, Insual peih reng thinlung a pu si, A thuchhuak chu hriak ang maiin a tlawr a, Khandaih hriam tak ang a ni si.

²² LALPA chungah i phurrit chu nghat la, Anin a chhâwk ang che, Mi dikte chu an nghîn a phal lo vang.

²³Aw Pathian, khuarkhurum thûkah chuan chhuktîr ang che, Thisen chhuah chîngte leh dâwt hehte chu, An dam tûr chanve pawh an dam lo vang, Kei erawh chu, nangmahah chuan ka innghat ang.