Read Mizo Lushai Sam 59 Bible Online

Sam 59 - Mizo Lushai bible

Sam 59

¹Aw ka Pathian, hmêlma lakah min chhanhim la, Min beitute lakah min hum tlat rawh.

²Thil sual titute lakah chuan min chhan chhuak la, Thisen chhuah chîngte kut ata min chhandam rawh.

³Ngai teh, min thah tumin min châng reng a, Mi nunrâwng pui puite an pung khâwm e; Ka bawhchhiat leh ka sual vâng a ni lo, LALPA.

⁴Thil ṭha lo ka tih vâng a ni hek lo, An tlân khâwm a, min hual tâk hi, Min pui tûrin lo tho harh la, en teh.

⁵ LALPA, Engkim Pathian, Israel-te Pathian i ni; Hnam dangte hi hrem tûrin lo thawk la, Vervêk taka che ṭhîn mi sualho hi khawngaih hauh suh ang che.

⁶Tlaiah an lo pung khâwm leh ṭhîn, Ui ang maiin min ngur min ngur, Khawpui chhûngah an vâk vêl ṭhîn.

⁷Min vau nasatzia hi ngai teh, An hmuite chu khandaih hriam tak ang hi a ni, “Tu nge hria ang?” an ti.

⁸ LALPA, nang chuan i nuihzat ang; Hnam tinrêng hi i nuihzatbûr bawk ang.

⁹Min tichaktu, ka thlîr reng che, Min hum ṭhîntu Pathian i ni si a.

¹⁰Ka chunga ngilnei ṭhîn Pathianin min lo hmuak ang a, Min dotute chau hmêl min entîr ang.

¹¹Aw Pathian, hêngho hi thah zawng that suh la, Ka mite hian an theihnghilh dah ang e, Vahvaihtîr la, i chaknain titlâwm dêr rawh, LALPA, kan phaw i ni.

¹²An ka chu sualin a khat a, An thu sawi pawh sual hlîr a ni. An chapona chhiat phah rawh se, ânchhe lawha dâwt sawi an chîng êm mai.

¹³Thinrimin tiboral la, ral vek rawh se, Jakoba chungah chuan Pathianin ro a rêl tih Kâwlkil thlengin hre vek rawh se.

¹⁴Tlaiah an lo pung khâwm leh ṭhîn, Ui ang maiin min ngur min ngur, Khawpui chhûngah an vâk vêl ṭhîn.

¹⁵Ei tûr zawngin an vâk ruai a, Kham tâwk an ei hma chu an vâk zankhua ta ṭhîn.

¹⁶Kei chuan i chakzia ka hril ang a, Zîng tak takah i ngilneihzia ka hril bawk ang, Ka tân mangan nia kulhpui i ni.

¹⁷Min tichaktu, zaiin ka fak ang che, Mi khawngaihtu chung Pathian hi Ka tân kulhbîng sâng chu a ni.