Read Mizo Lushai Sam 62 Bible Online

Sam 62 - Mizo Lushai bible

Sam 62

¹Pathian chu ka nghâk fanfan ṭhîn a, Amah chauh hi min chhandamtu a ni.

²Amah chauh hi ka tân himna lungpui a ni, Min hum ṭhîntu a nih avângin ka nghîng mai mai lo vang.

³Bang âwn leh pal tlu ṭêp ang lek hi, Nangni hian tihchim tumin eng chen nge min beih dâwn?

⁴A dinhmun sâng ata hnuh thlâk zai in rêl a, Dâwt sawi in lâwmzâwng tak a ni. In ṭawng chhuak chu a thlum hle a, In rilruin ânchhia in lawh si.

⁵Pathian chu ka nghâk fan fan ṭhîn a, Amah chauh hi ka innghahna a ni.

⁶Amah chauh hi ka tân himna lungpui a ni, Min hum ṭhîntu a nih avângin ka nghîng mai mai lo vang.

⁷Pathian chu min chhantu leh min tiropuitu a ni, Ka lungpui nghet tak, ka belh Pathian a ni.

⁸A mite u, eng lai pawhin ani chu ring ula, Engkim hrilh ṭhîn rawh u, Kan belh Pathian a ni si a.

⁹Mihringte hi thaw ang lek an ni a, Milian, mitê, engmahlo mai an ni; Han bûk mah la, an zâng heih a, Boruak ang leka zâng an ni.

¹⁰Chuhhelh taka thil neih innghah nân hmang suh la, Mi thil chhuhsaka hausak tum hek suh. Hausa thûr thûr mah la, Rilru innghah nân chuan hmang suh.

¹¹Vawi hnih vawi thum Pathianin a sawi ka hre tawh, Thiltihtheihna hi zawng Pathian ta chauh a ni.

¹² LALPA, ngilneihna hi nangma ta chauh a ni, An thiltih ang zêla mite rûltu i ni.