Read Mizo Lushai Sam 64 Bible Online

Sam 64 - Mizo Lushai bible

Sam 64

¹Ka mangang au hi, aw Pathian lo ngaithla la, Hmêlma hlauhawm lakah ka nun hi hum ang che.

²Mi sual pung khâwm lakah min thukru la, Thil dik lo titute kal khâwmho lakah chuan.

³Khandaih angin an lei an tât hriam a, Thu huatthlala tak chuan thal angin min tin.

⁴Mi pawi sawi lo kah hlum tumin an châng ru a, An kâp thut ṭhîn, hlauh rêng an nei lo ve.

⁵Thil sual ti tûrin an intêl ruh a, Thang kam rûk zai an rêl. “Tu nge hmu ang?” an ti.

⁶Thil sual an rawt chhuak a, “Hmuh chhuah rual loh kan rawt tâk hi,” an ti. An ngaihtuahna chu a thûk a ni.

⁷Pathianin a kâp ve thung ang a, An tlu nghâl phung ang.

⁸An thu sawi ngei chu an chhiat phah ang a, A hmu apiangte chuan an lu an thin khum ang.

⁹Mi tinin an hlau vang a, “Pathian tih a ni,” an ti ang a, A hna thawhte an hrethiam ang.

¹⁰Mi dikte chu LALPA-ah chuan an lâwm ang a, Amahah chuan an tlulût ang, Mi ngîlte chuan amah an chhuang bawk ang.