Read Mizo Lushai Sam 65 Bible Online

Sam 65 - Mizo Lushai bible

Sam 65

¹Aw Pathian, Zion-ah chuan fak tûr i ni, Thutiamte pawh i tân hlen tûr a ni.

²Ṭawngṭai ngaithlatu i ni a, Mi tinrêng i hnênah an lo kal ang.

³Kan sualna chu sawi sên a ni lo va, Nang chuan kan bawhchhiatnate i ngaidam ṭhîn.

⁴I chênnaa awm ve tûra i thlan, I kianga awm tûra i tihte chu an nihlawh e. I ina thil ṭhate chênin kan tlai ang a, I tempul thianghlima i malsâwmnate chuan.

⁵Min chhandamtu Pathian, Dik tak leh mak taka thil tiin min chhâng a, Khawvêl pum puia mi leh tuifinriat râl hla taka Awmte pawh hian, an ring ta che.

⁶I chaknain tlângte i hûng mup a, I thiltihtheihzia i lantîr hi.

⁷Tuipui rûm hum hum te, Tuifâwn ri hlup hlup te, Mipui sa mur mur te i tidai a,

⁸Hmun hla taka awmte pawhin I thil tih makte chu mak an ti a, Zîng leh tlai lo thleng chuan lâwmna a rawn thlen ṭhîn.

⁹Lei hi i ngaihsak a, ruahtuiin i châwm a, Nasa takin i titui a, Luikawrte chu tuiin i tikhat a, Tichuan, buh hmun atân lei chu i buatsaih ṭhîn.

¹⁰Lei rih thlûr chu tui i leih a, A pâwng laite a tla muk a, Ruahtuiin a tinêm a, Thlai thar i chawrtîr ṭhîn.

¹¹Kum a lo vei chuan a tawntawin thlai i thartîr a, I kalna apiangah chuan a awm rei rui ṭhîn.

¹²Thlalêr ram rovahte hnim a duah hluah hluah a, Mualte pawh chu a hring dup mai.

¹³Phûlahte chuan ran an tla noh noh va, Ruamahte chuan buh hlîr a tlim hmur mai, Hlima auvin hla an sa.