Read Mizo Lushai Sam 66 Bible Online

Sam 66 - Mizo Lushai bible

Sam 66

¹Khawvêl pum puia chêng zawng zawngte u, Pathian chu fak chiam rawh u.

²A hming ropui tak hi fak ula, Ropui takin chawimawi rawh u.

³“I thiltihte a va mak êm! I chak êm avângin hmêlmate chu an kimki a,

⁴Mi zawng zawngin chibai an bûk a che. I fakna hla sa-in I hming an fak,” Pathian hnênah ti rawh u.

⁵Lo kal ula, Pathian thiltihte hi han en teh u, Mihring zînga a thil tih mak râpthlâk tak hi.

⁶Tuipui thûk chu leichâr a chantîr a, Lui chu kêin an kal kai ta. A thiltih avângin, tah chuan kan hlim êm êm a ni.

⁷A chaknain ro a rêl reng a, Hnamte a enthla reng a ni. Luhlulte chu lo induh mai suh se.

⁸Mi zawng zawngte u, kan Pathian hi fak rawh u, Hriat thamin in awte chhuah rawh u.

⁹Dam takin min awmtîr a, Kan tlûkchhiat lah a phal hek lo.

¹⁰Aw Pathian, nang chuan min enfiah a, Tangkarua meia an fiah angin Nang chuan min fiah a ni.

¹¹Thangah min awhtîr a, Manganna chuan min delh ta a.

¹²Kan lu chungah mi an chuang a, Mei leh tui lian kan pal tlang bawk, Mahse, hmun chênghnâwngah min dah tâk hi.

¹³I inah chuan hâlral thilhlan ka rawn keng ang a, Ka thutiam pawh ka hlen ngei ang.

¹⁴Ka sawi tawh kha ka rawn ti ang, Mangan laia ka sawi ang khân.

¹⁵Ran châwm thau hâlral ka rawn hlân ang che a, Berâm hâl rimtui khute nên, Bâwngpa leh kêlchalte ka hlân bawk ang.

¹⁶Pathian ṭihtute u, lo kal ula, ngaithla teh u, A thil min tihsak chu ka hril dâwn e.

¹⁷Ani chu ka au va, Ka leiah hian fak hla a khat.

¹⁸Ka thinlunga sualna khawi ka nih chuan LALPAN ka thu a ngaithla lo vang.

¹⁹Pathian chuan ka thu a ngaithla ngei asin, Ka dîlna chu a lo ngaihven tak tak a ni.

²⁰Pathian chu fakin awm rawh se, Ani chuan ka ṭawngṭaina a hlawhchhamtîr lo va, Ka tân a ngilneihna a dai hek lo.