Read Mizo Lushai Sam 68 Bible Online

Sam 68 - Mizo Lushai bible

Sam 68

¹Pathian lo thawk sela, hmêlmate darh rawh se, A hmaah chuan amah hawtute chu tlânchhe rawh se.

²Meikhu a zâm darh ang hian lên darh ang che, Mei lum bula khawihnûn a tui ang hian, Pathian hmaah mi sualte chu tui ral rawh se.

³Mi dikte erawh chu Pathian hmaah hlimin an lâwm ṭhîn a, Hlim takin an au chêl chûl ṭhîn.

⁴Pathian hnênah hla sa ula, A hming fakin zai ula, Chhûm chunga chuanga tân kawng buatsaih rawh u; A hming chu LALPA a ni, Amah chu fak rawh u.

⁵Hmun thianghlima chêng kan Pathian chu, Fahrahte tân Pa a ni a, Hmeithaite ngaihtuahtu a ni.

⁶Mi tlahlangte chu chhûngkua a dinsak a, Tângte a hruai chhuak a, an hamṭha ta, Luhlulte erawh chu ram rovah a awmtîr ta.

⁷Aw Pathian, i mite hma hruaia, Thlalêr rama i kal lai khân,

⁸Sinai tlâng Pathian hmaah, Lei a nghîng a, vân aṭangin ruah a lo sûr a,

⁹Ruahte i sûrtîr tlâwrh tlâwrh a, I ro, ram châr tawh chu i tiduah leh ta a.

¹⁰I mite chuan awmhmun an khuar ta a, Aw Pathian, i ṭhat avângin retheite i buatsaihsak a ni.

¹¹ LALPAN thu a pe a, Hmeichhe tam takin chanchin ṭha chu an puang a,

¹²“Lalte leh an sipai rualte chu An tlânchhe zêl mai e,” tiin. In nghâk hmeichhiate chuan râllâk sum an insem a,

¹³Mei vil mai maite pawhin, Ṭhuro lim, a thla tangkaruaa siam, A thla hmâwr rangkachaka tuam chu an chang.

¹⁴Engkimtitheian lalte a tihdarh khân Zalmon tlângah vûr a tlâktîr.

¹⁵Basan tlâng hi tlâng ropui tak a ni a, Chhîp sâng pui a nei thluah mai.

¹⁶I tlângchhîp aṭangte chuan A chên nâna Pathian duhthlan tlâng hi, Engtizia nge i er mai le? Kumkhuaa LALPA chênna tûr asin.

¹⁷Pathian tawlailîr sâng tam tak nên, Sinai tlâng aṭangin a hmun thianghlimah chuan LALPA chu a lo kal e.

¹⁸A tlâng sângah a lâwn chho va, Sal man a hruai duah duah bawk a, Mihringte thilpêk a lo dawng a, Hel hmangte pawhin an rawn hlân ve; Tah chuan LALPA Pathian a chêng tawh ang.

¹⁹ LALPA chu fak rawh u, Min chhandamtu kan Pathian hian, Ni tin kan phurritte min chhâwk ṭhin hi.

²⁰Kan Pathian hi chhandam ṭhîntu Pathian a ni a, Kan LALPA hi LALPA, thihna ata min humtu a ni e.

²¹Pathian chuan hmêlmate lu a vaw keh ang, Suahsual chîng lu chhîp bukte chu.

²²“Basan ram aṭangin in hmêlmate ka rawn hruai ang a, Tuifinriat mawng ata ka rawn khâwm ang.

²³An thisen chu in dai ang a, In uite chuan an duh tâwk an liak ang,” LALPAN a ti.

²⁴Aw Pathian, i lo kal kha mi tinin an hmu che, A hmun thianghlim pana ka lal, Ka Pathian kal chu.

²⁵Hla sa pâwlten hma an hruai a, A hnung lamah ṭingṭang tum miten an zui a, A laiah chuan nula rualin benchhek an bêng.

²⁶“Pungkhâwm zîngah Pathian chu fak ula, Jakoba thlahte u, LALPA chu fak rawh u,” an ti.

²⁷A hnam tlêm ber Benjamin chu hmahruaitu an ni a, Juda hnam puipaten an dawt a, Zebulun leh Naftali hruaituten an zui leh a.

²⁸Aw Pathian, kan tân thil mak min tihsak ṭhinna, I thiltihtheihna kha han tilang teh.

²⁹Jerusalem khuaa i tempul aṭangin, Lalten thilpêk an rawn pêkna hmun aṭang khân.

³⁰Phairuang hmuna awm ṭhîn sa hrâng Aigupta khu zilh la, Khu hnam, bâwng kawlh leh an note awm khâwm khuan, Tangka duhin mi an chîl a. Indo châkho khu ûm darh rawh.

³¹Aigupta ram aṭangte chuan palai an lo kal ang, Kus mite pawh Pathian hmaah an kut an rawn phar ang.

³²Khawvêla lalramte u, Pathian hnênah hla sa ula, LALPA fakna hla sa rawh u.

³³Hmasânga awm, Vân chunga chuanga chu, Ring takin a au ve, ngaithla rawh u.

³⁴Pathian thiltihtheihzia puang chhuak ula, A ropuina, Israel-te chungah a awm ṭhîn a. A chakna chu vânah a awm a ni.

³⁵A hmun thianghlima awm Israel-te Pathian chu ṭih tûr a ni, A mite chu chakna leh thiltihtheihna a pe a, Pathian chu fak rawh u.