Read Mizo Lushai Sam 69 Bible Online

Sam 69 - Mizo Lushai bible

Sam 69

¹Aw Pathian, min chhan chhuak rawh, Tuite chuan min chîm pil lek lek a;

²Chirhdûpah chuan ka tâng ta a, Rah chhan tûr rêng a awm si lo. Tui thûkah chuan ka awm ta a, A fâwnah chuan ka pil dâwn hi.

³Ṭanpui dîla ka auna lamah chuan ka chau ta a, Ka dangte pawh a ro zo va, Pathian thlîrin ka mit a vai zo ta.

⁴Chhan awm lova min hawtute chu Ka sam aiin an tam tâk hi. Mi chak pui puite chuan mi nuai bo an tum a, Dâwta min bei ṭhîntute chuan Ka rûk loh pawh min pêk kîrtîr a ni.

⁵Aw ka Pathian, ka âtzia hi i hre vek a, Ka thiam lohnate i lakah thup a ni hek lo.

⁶ LALPA, Engkim LALPA, Keimah avângin nangmah nghâktute chu zak suh sela, Israel-te Pathian, Keimah avângin nangmah zawngtute chu mualpho suh se.

⁷Nangmah avângin hau ka tuar a, Men ngaihna pawh ka hre ta lo.

⁸Ka unaute tân mikhual ang ka ni a, Ka pianpuite tân pawh ram dang mi ang ka ni.

⁹I in tâna ka ṭhahnemngaihna chuan Mi luah tlat a, An chêksawlhna che chu Ka phur zêl ṭhîn.

¹⁰Ṭapa chaw ka nghei leh miten min hmusit zui a,

¹¹Saiip puan ka sin leh min nuihzat a.

¹²Kulh kawngkhâra ṭhuten min rêl zui a, Zu ruite chuan hlaah min chham.

¹³Kei zawng, LALPA, i hnênah chuan ka ṭawngṭai ang, Ṭha i tih hunah mi chhâng ang che. Aw Pathian, i ngilneihna nasa tak leh I chhandamna rin tlâk tak chuan min chhâng ang che.

¹⁴Chirhdûp ata min chhan chhuak la, Ka pil mai chu phal suh ang che. Min hawtute leh tui thûk tak ata chu Min chhan chhuak bawk ang che.

¹⁵Tui lian chu min len botîr suh la, Tui thûkah ka tlâk phal lo la, Thlân kotlângah min liamtîr suh ang che.

¹⁶ LALPA, i ngilneihna a ṭha si a, min chhâng ang che, I lainatna nasa tak chu ka chungah lantîr ang che.

¹⁷I chhiahhlawh lakah hian i hmêl thup suh, Ka mangang êm a ni, min chhâng thuai rawh.

¹⁸Lo kal hnai la, min tlan ang che, Hmêlma lakah min chhan chhuak rawh.

¹⁹Min chêksawlh dânte hi nangin i hre reng a, Ka zahzia te, ka mualpho dânte pawh Ka hmêlmate i hmu vek bawk.

²⁰Min hmuhsitna chuan ka lung a tichhia a, Na ka ti êm êm a ni. Khawngaih ka beisei a, tu man min khawngaih lo, Thlamuantu tûr tu mah ka hmu zo lo.

²¹Ka ei tûrah tûr an pawlh a, Ka tuihâl chu zu ṭâwng min pe.

²²An ruai ṭheh chu chhiat phah sela, An inremna ruai pawh chu an tân fal chang rawh se.

²³An mitte chu tihdelsak la, Eng mah hmu thei suh se, An kâwngte chu khûr zawih zawih bawk rawh se.

²⁴I thinurna chu an chungah leih la, I thinrimna chuan nangchîng rawh se.

²⁵An chênna chu ram sela, An puan inah tu mah chêng hek suh se.

²⁶Nangin vuak i tuartîrte chu an sawisa a, Hliam i tuartîrte natzia chu sawi nuam an ti.

²⁷I hremna tûr chu tihpunsak la, I chhandamna chu chang ve suh se.

²⁸Nunna bu ata chu an hming thai chhia la, Mi dikte zîngah chuan an hming ziak suh.

²⁹Kei zawng na tuarin ka rûm hi, Aw Pathian, min chhan la, Hmun râlmuangah min hlâng ang che.

³⁰Pathian hming chu fakin ka zai ang a, Lâwmthu hrilin ka chawimawi ang.

³¹ LALPA tân chuan ran hlan aiin chu chu a ṭha, Bâwngchal, ki leh tin sei tak nei hlan ai pawhin.

³²Tihretheihten an hmuh hun chuan an lâwm ang a, Pathian zawngtu thinlung chu a nung thar ang.

³³Retheite thu LALPAN a ngaithla a, A ni, saltângte chu a zahpui lo.

³⁴Lei leh vânten amah fak rawh u, Tuifinriat leh a chhûnga chêngte chuan fak rawh u.

³⁵Pathian chuan Zion khua chu a hum ang a, Judai ram khuate chu a din leh ang. A mite chuan an luah ang a, Ram chu an nei tawh ang.

³⁶A chhiahhlawh thlahte chuan an rochung ang a, A hming ngainatute chu tah chuan an chêng bawk ang.