Read Mizo Lushai Sam 7 Bible Online

Sam 7 - Mizo Lushai bible

Sam 7

¹Aw LALPA, ka Pathian, ka rawn bêl a che, Mi ûmtute lakah hian min lo chhan la, min humhim ang che.

²Chutilo chuan, sakeibaknei angin min pawt thlêr ang a, Chhantu nei lovin, min pawt sawm dah ang e.

³Aw LALPA, ka Pathian, Hêng thil hi ka tiha, Ka kut hian thil sual a khawiha,

⁴Ka ṭhiante chu phatsana, Ka hmêlmate chhan awm lova ka tihchhiat bawk chuan,

⁵Min dotuten min ûm sela, min man rawh se. Leiah min chîl thlu sela, Ka ruang pawh chu vaivutah zalh dêr rawh se.

⁶ LALPA, thinurin lo thawk la, Ka hmêlmate thinrim sosâng hi han hmachhawn teh, Aw ka Pathian, harh la, min pui rawh, Dikna hi i duhzâwng a ni si a.

⁷I vêlah hian mipui lo pung khâwm sela, Chung lam aṭangin ro han rêlsak ang che.

⁸Aw LALPA, mi tin rorêlsaktu i ni, Aw Chungnungber, mi dik leh mi ngîl ka nih ang zêlin ro mi rêlsak ang che.

⁹Mi suaksualte sualna chu han titâwp la, Mi ṭhate erawh chu tinghet ang che. Nang chu rilru leh thinlung fiahtu, Pathian dik i ni si a.

¹⁰Pathian Chungnungbera chu ka phaw a ni, Mi nun tluangte chhandamtu chu.

¹¹Pathian chu dik taka rorêltu a ni a, Mi sual chunga thinur reng ṭhîn Pathian a ni.

¹²An sim loh chuan khandaih a tât hriam ang a, A thalngul chu kuaiin a tin bawk ang.

¹³Thihna hriamhrei lain, A thal alh thei a hmang ngei ang.

¹⁴Sual ngaihtuah chhuah an thiamzia hi en teh, A chimawm zâwnga awm an thiam hle a, Thil khawlo tak an tichhuak ṭhîn.

¹⁵Khur an lai a, an zauh zêl a, An hum laihah ngei chuan an tla ta zâwk.

¹⁶Mahni chunga pawi khawih an ni a, an nunrâwnna ngei chuan a vaw lêt ang.

¹⁷ LALPA chu a dik avângin lâwmthu ka hrilh ang a, LALPA, Chungnungbera hming chu fakin ka zai bawk ang.