Read Mizo Lushai Sam 71 Bible Online

Sam 71 - Mizo Lushai bible

Sam 71

¹ LALPA, i hnênah chuan ka lo tlulût ta a, Engtikah mah mualpho takin min awmtîr suh ang che.

²Mi fel i ni a, min chhan chhuak la, min hum ang che, I beng chhi la, min chhandam rawh.

³Ka awm nân lungpui nghet ni la, I thu angin lo kal ngei rawh.

⁴Aw ka Pathian, mi sual kut ata min chhan chhuak la, Mi suaksual leh mi nunrâwng kut ata chu.

⁵ LALPA, nang chu ka thlîr ber i ni ṭhîn a, LALPA, ka tleirâwl chhuah ata ka ring che a ni.

⁶Ka pian tirh aṭangin ka rinchhan ber i ni a, Ka nu pum chhûng ata min lachhuaktu i ni. Ka fak kumkhua ang che.

⁷Mi tam tak thlîr rawn ka ni a, Mahse, ka tân tlûkluhna nghet tak i ni.

⁸Eng lai pawhin ka fak fo ṭhîn che a, Ni tin ka chawimawi ṭhîn che a ni.

⁹Ka lo tar ta a, min hnâwl suh la, Ka lo chak lo ta a, min thlahthlam suh.

¹⁰Ka hmêlmaten ka chungthu an sawi a, Min vehtute an inrâwn khâwm.

¹¹“Pathian pawhin a kalsan ta, I ûm ang u, kan man dâwn nia, Chhantu tûr rêng a nei lo ve,” an ti.

¹²Aw Pathian, min hlat lul suh, Aw ka Pathian, min rawn ṭanpui thuai rawh.

¹³Min beitute chu chauvin mualphovin mangang sela, Ka chhiatna tûr zawngtute chu Zakin mangang hle rawh se.

¹⁴Kei chuan nangmah chauh hi ka beisei i ni a, Ka fak deuh deuh vang che.

¹⁵I dikzia hi mi tin hnênah ka sawi ang a, Ka hril sêng lo nâng a, I chhandamna thu chu ka puang bawk ang.

¹⁶ LALPA, i ropuizia ka puang ang a, LALPA, i dikzia chauh hi ka hril ang.

¹⁷Aw Pathian, ka tleirâwl chhuah ata min zirtîr a, Tûn thleng pawhin i thil mak tih ka hril zêl ṭhîn.

¹⁸Ka lo tarin ka lu a ṭuak ta a, Aw Pathian, min kalsan suh. I ropuizia leh i thiltihte hi, Ṭhangthar lo awm tûrte Ka hrilh hma chu min awmpui rawh.

¹⁹Aw Pathian, i dikna chuan vân khi a tawng, Thil ropui tak i tih ṭhin hi, Nangmah ang hi tu mah rêng an awm lo.

²⁰Manganna leh thil ṭha lo tam tak min tuartîr a, Mahse, nangin min tiharh leh ṭhîn a, Khur thûk ata min la chhuak ta.

²¹Min chawisâng lehzual sauh ang a, Min thlamuan leh dâwn e.

²²Perhkhuang tumin ka fak ang che a, I rinawmzia, aw ka Pathian, ka fak bawk ang. Israel Mi Thianghlima chu, ṭingṭang nên ka fak ang.

²³Min chhandam avângin Ṭingṭang tuma lâwmin ka au chiam ang.

²⁴I dikzia chu nilêngin ka sawi ang a, Mi tihchhiat tumtute an mualpho ta si a.