Read Mizo Lushai Sam 72 Bible Online

Sam 72 - Mizo Lushai bible

Sam 72

¹Aw Pathian, i rorêl thiamna chu lal hi pe la, I dikna pawh pe bawk ang che.

²I mite chungthu hi fel taka a rêl theiha, Mi retheite ro pawh dik taka a rêl theih nân.

³Tlângten malsâwmna thlen sela, Mualten dikna thlen bawk rawh se.

⁴Mi retheite ro chu dik takin rêl sela, Pachhiate pawh chhan ṭhîn sela, Hnehchhiahtute erawh chu sawisa hrep rawh se.

⁵Ni leh thla khi a ên chhûng chu, Chhuan tam tak thlengin ṭih che rawh se.

⁶Hnim chunga ruahsûr ang ni se, Lei ro chunga ruahpuivânâwn a sûr ang hi.

⁷A dam chhûngin dikna hi lal sela, Thla khi a ên chhûng chu malsâwmna pung rawh se.

⁸A ram chuan tuifinriat râl kai sela, Khawchhak luipui aṭang khian kâwlkil khu thleng rawh se.

⁹Thlalêra chêngte chuan chibai rawn bûk sela, A hmêlmate a hmaah chuan bawkkhup rawh se.

¹⁰Tarsis lal leh thliarkâra lalte chuan, Lâwmman rawn hlân sela, Arab lal leh Seba lalte pawhin Thilpêk rawn keng rawh se.

¹¹Lal zawng zawngte a hmaah kûn sela, Hnam tinrêngin a rawng rawn bâwl rawh se.

¹²Manganga aute chu a chhan ang a, Chhantu nei lo retheite pawh.

¹³Retheite leh pachhiate chu a khawngaih ang a, Mangangte nunna chu a humhim ang.

¹⁴Nêkchêpte leh râwng taka sawisakte a hum ang a, An nunna chu a tân a hlu a ni.

¹⁵Lal chu dam reng sela, Seba ram rangkachak rawn pe rawh se. Ṭawngṭaisak fo sela, Malsâwmna pawh dawng reng rawh se.

¹⁶Ram pum puiah a tawntawin buh hâwng sela, Lebanon tlânga thei a rah tup ṭhîn angin Tlâng chhîpahte rah tiar tuar bawk rawh se. Ram ṭhaa hnim a bit angin, Khuaahte chuan mi khat rawh se.

¹⁷Kumkhua pawhin a hming a dai lo vang, Ni khi a ên chhûng chu a hming thang zêl rawh se. Hnam tinrêngin a zâr zo se, Duhsak rawh se.

¹⁸ LALPA Pathian, Israel-te Pathian chu fak ula, Ani chauh hian a ni, hêng thil mak hi ti ṭhîn ni.

¹⁹A hming ropui tak chu chawimawi kumkhua ula, Lei pum pui hi a ropuina chuan khat rawh se. Amen, Amen.

²⁰Jesaia fapa Davida ṭawngṭaina chu a tâwp ta.