Read Mizo Lushai Sam 73 Bible Online

Sam 73 - Mizo Lushai bible

Sam 73

¹Israel-te chungah hian Pathian a lo ṭha ngei mai e, Thinlunga thianghlimte chungah chuan.

²Kei chuan ka ringhlel lek lek ṭhîn a, Ka tlu ṭhelh ṭhelh fo mai.

³Mi sualte vânneihzia ka han hmuh hian, Chapote chu ka awt hle ṭhîn.

⁴An thih pawhin na an tuar lo va, An thau mûm kûng bawk si.

⁵Mite angin an thawk rim ve lo va, Mi dang tuar ang hrehawm an tuar hek lo.

⁶An chapo êm êm a, An nun a râwng êm êm bawk.

⁷An thau avângin an mit a pâwng a, An duhsâm chuan chin lêm a nei hek lo.

⁸Mi dang an nuihzat a, thil sual an sawi ṭhîn a, Chapo takin mi dang an vau bet a.

⁹Vâna Pathian tlukin an insawi a, An thuin mihringte an hneh zêl a.

¹⁰Pathian mite meuh pawhin an lam an hawi a, An sawi apiang an awih zêl a.

¹¹“Pathianin a hre lo vang, Chungnungberan a hmu hek lo vang,” an ti.

¹²Hei hi mi sualte awm dân chu a ni: An awm der der a, an hausa tulh tulh si.

¹³Ka lo invawng thianghlim thlâwn mai em ni? Thil sual eng mah ka khawih lo chung hian,

¹⁴Nilêngin ka tuar ṭhîn a, Tûk tina min zilh ṭhin hi?

¹⁵“An tih angin ka ti ve ang,” ti ila chuan, I fa, tûnlai mite hi ka bum a ni dâwn si.

¹⁶Hêng hi hriatthiam ka han tum ṭhîn a, Harsa ka ti ngei mai.

¹⁷Mahse, Pathian hmun thianghlima ka han luh chuan, An tâwp dân tûr ka hmu chiang ta.

¹⁸Hmun nâl takah i dah reng a lo ni a, Chhiatnaah chuan an tlulût ngei ngei dâwn.

¹⁹Mit khap kâr lek chhûngin an ral ang a, Râpthlâk takin an chhe vek ang.

²⁰Zînga mumang ral ta ang hi an ni, LALPA, nang meuh i lo thawh chuan, I tân hlimthla ang lek an ni.

²¹Ka lung a chhiat hlea, Ka thin a nat êm êm lai chuan,

²²Ka rilru a buai a, ka hrethiam thei lo, I hmaah chuan ramsa ang mai ka ni.

²³Mahse, i bulah chuan awm ka chuh tlat a, Ka kut ding lam hi min lo chelhsak ṭhîn.

²⁴Nangin min fuihin, min kaihruai a, Nakinah chuan ropui takin min lo lâwm ang.

²⁵Nang lo chu vânah khian tu nge ka neih? Leiah pawh hian nang lo chu tu mah duh ka nei lo ve.

²⁶Ka taksa leh ka rilru hi a lo chau ṭhîn a, Mahse, Pathian chu ka tân lungpui nghet tak a ni, Ani chu eng lai pawhin ka awmna tûr a ni.

²⁷Nangmah hlattute erawh chu an ral ang a, Nangmah tlânsantute chu i tiboral ang.

²⁸Keia tân zawng Pathian hnaih hi a ṭha a ni, LALPA Pathian chu tlûkluh nân ka hmang a, A thil mak tih zawng zawng hi ka hril zêl ang.