Read Mizo Lushai Sam 74 Bible Online

Sam 74 - Mizo Lushai bible

Sam 74

¹Aw Pathian, engtizia nge min kalsan tâk daih a, I rama mite ngei chungah i thinur reng dâwn em ni?

²Hmasâng ata i mi tûra i neihho, I rochan, i tlan hnamte hi, I chênna ṭhîn Zion tlâng nên han hre reng ang che.

³A chhe rem rum tawh chu han tlawh la, Hmêlmate chuan i hmun thianghlim an tihchhiat zawh tâk hi.

⁴I mite punkhâwmnaah hmêlmate chu an haw haw dur dur a, An puanzârte chu an târ thluah mai.

⁵Ngawpui ṭhiat tûr ang maiin, An hreikawl chu an lek tâk hi.

⁶Thing suih mawi zawng zawngte, Hrei leh tubohvin an chhu chhe ta.

⁷I hmun thianghlim an hâl chim a, I chênna hmun chu an tibawrhbâng zo ta.

⁸Min tihdarh vek an rilrûk a, Kan ram chhûnga Pathian biakna hmun apiang chu, An hâl zêl mai.

⁹Kan hnam puanzâr târ hmuh tûr a awm lo va, Zâwlneite lah an awm tawh lo, Engtia rei nge hetia kan awm dâwn Hria pawh kan awm ta lo.

¹⁰Aw Pathian, hmêlmate hian eng chen nge an deu ang che? I hming an hmusit reng dâwn em ni?

¹¹Engtizia nge i kut i lâk kîra, I kuangkuah tâk tlat le? Tiboral hlawm rawh.

¹²Aw Pathian, hmasâng ata kan Lal i ni, Leia i mite chhandam ṭhîntu i ni.

¹³Tuifinriat chu i chaknain i tiṭhen a, Tuipui chhûnga rûlpui lu chu i tikeh ta,

¹⁴Leviathan lu i chhu keh bawk. Thlalêra chêngte ei atân a sa i pe.

¹⁵Tuihna i chhun chhuak a, a luankawr i siam a, Luipui luang laite chu i tikang bawk.

¹⁶Chhûn leh zân hi i ta a ni a, Êntu leh ni te khi i dah a ni.

¹⁷Leilung ramri i kham chhuak a, Nipui leh thlasik hi i siam a ni.

¹⁸ LALPA, hmêlmate deuna hi hre reng ang che, Hnam â-te chuan i hming an sawichhiat hi.

¹⁹Sakawlhho kutah chuan i mite hi pe suh ang che, I mi, retheite hi theihnghilh reng suh.

²⁰I thuthlung kha ngai pawimawh la, Ram chhûnga hmun thim laite chu Nunrâwnnain a khah tâk hi.

²¹Hnehchhiahte chu mualpho takin awmtîr suh la, Pachhiate leh retheite chuan i hming hi fak rawh se.

²²Aw Pathian, lo thawk chhuak la, I thu han kengkawh teh, Mi â-te chuan ni tin an deu che hi hre reng ang che.

²³I hmêlmate thâwm hi theihnghilh suh la, Nangmah beitute au thâwm chu a rîk hluah hluah reng hi.