Read Mizo Lushai Sam 77 Bible Online

Sam 77 - Mizo Lushai bible

Sam 77

¹Aw chhuah meuhvin, Pathian chu ka ngên ang a, Ka au vang a, ka aw a lo hria ang.

²Mangan laiin LALPA chu ka zawng a, Bân phar chungin ka ṭawngṭai zânkhua ṭhîn, Mahse, ka thla a muang thei lo.

³Pathian ka ngaihtuahin ka rûm ṭhîn a, Ka suangtuahin ka chau hnêp ṭhîn.

⁴Mi timuhîl thei lo va, Ka vei ka vei ṭhîn a, sawi tûr rêng ka nei lo.

⁵Hmânlai ka ngaihtuah a, Hun liam ta zawng zawng ka hre chhuak ṭhîn.

⁶Zânah ka ngaihtuah neuh neuh va, Ka dâwn vêl a, ka inkhâpthlu dêr ṭhîn.

⁷ LALPAN min thlauhthla reng dâwn em ni le? Ka chungah hian a lâwm dâwn tawh lo em ni aw!

⁸Mi khawngaih tawh lovin, A thutiam kha a titâwp hlen dâwn em ni?

⁹Pathianin min lainatna kha a theihnghilhin, Thinur vângin a ngilneihna a titâwp dâwn em ni?

¹⁰Chungnungbera kut chuan ngai a ang ta lo hi, Ka thin tinatu ber chu a ni.

¹¹ LALPA thiltihte chu ka hre reng ang a, Hmasânga thil mak tak tak a tihte pawh ka hre reng ang.

¹²I thiltih ṭhinte chu ka ngaihtuah fo vang a, Thil ropui tak i tihte pawh ka chhui bawk ang.

¹³Aw Pathian, i kawng chu a thianghlim a, Nangmah ang rênga ropui hi pathian an awm lo.

¹⁴Nang zawng thil mak ti ṭhîn Pathian i ni a, I chakzia hi hnam tin i hriattîr ṭhîn.

¹⁵I bân chak chuan i mite chu i tlan a, Jakoba leh Josefa thlahte chu.

¹⁶Aw Pathian, tuite chuan an hmuh che chuan, An hlau va, tui thûkte pawh an khûr.

¹⁷Chhûmin ruah a sûrtîr ṭhîn a, Vân aṭangin khawpui a ri dur dur bawk a, Kâwlphete chu a de zawr zawr a ni.

¹⁸Ṭhâwngaleivirah chuan khawpui chu a ri a, Khawvêl hi kâwlphe chuan a ên chhuak a, Lei chu a nghîng dawt dawt a ni.

¹⁹Tuipuiah chuan i kal ṭhîn a, Tuifinriat pawh i fang chhuak a, Mahse, i hniak hmuh tûr a awm si lo.

²⁰Mosia leh Arona kut hmangin I mite chu berâm angin i kaihruai ṭhîn.