Read Mizo Lushai Sam 78 Bible Online

Sam 78 - Mizo Lushai bible

Sam 78

¹Ka mite u, ka zirtîrna hi ngaithla ula, Ka thute hi lo ngaihven rawh u.

²Tehkhin thu ka sawi ang a, Hmasâng thu rilte chu ka phuh chhuak dâwn.

³Kan ngaihthlâk ṭhin, kan thu hriat te, Kan pi puten min hrilh ṭhin kha,

⁴An fate hnênah chuan kan zêp lo vang, LALPA ropuina leh a chakna te, Thil mak a tih ṭhin thute kha kan hril zêl ang.

⁵Jakob-ho chu hriat tûr a siamsak a, Israel-ho tân dân chu a pe; An thlahte hrilh chhâwng zêl tûrin, kan pute chu thu a pe bawk;

⁶Ṭhang lo thar zêlte chuan an zir theiha, La piang tûrte pawhin an fa leh te An zirtîr chhâwn tûrin.

⁷Pathian chu an rina, a thiltihte theihnghilh lova, A thupêkte an zawm theih nân.

⁸An pi pute anga awm tûr an ni lo va, Luhlul chhuaha hel chîng, Thinlung nghet lo, Pathian laka Rinawm lo an nih ve loh nân.

⁹Efraim-ho chu thal nên an inthuam a, Inbeih ni chuan an tlânchhiat kha.

¹⁰Pathian thuthlung an zâwm lo va, A Dân angin an awm duh lo.

¹¹A thiltihte an theihnghilh a, Thil mak a hmuhtîrte an hre reng lo.

¹²Aigupta ram Zoan phaiah An pute hmuh atân thil mak tak tak a ti.

¹³Tuipui a tiṭhen a, a kal kaitîr ta a, Tui chu bang ang maiin a dintîr kha.

¹⁴Chhûnah chhûmin a hruai ṭhîn a, Meialh êngin a hruai zankhua bawk ṭhîn.

¹⁵Thlalêrah khân lungpui a vaw khi a, Luipui tui anga tam tui a pe a.

¹⁶Lungpui ata tui a luan chhuahtîr chu Luipui angin a luang ta dur dur a.

¹⁷Chuti pawhin a lakah chuan an sual lui a, Thlalêrah khân Chungnungbera lakah an hel.

¹⁸Pathian an fiah ta ngat mai a, An ei châkzâwng an dîl.

¹⁹Pathian an sawi hnâwm a, “Thlalêr rovah Pathianin ruai a ṭheh thei dâwn em ni?

²⁰Lungpui vuain tui a luan chhuahtîr ngei a, Chaw meuh min pe thei dâwn em ni? A mite hi sa a pe thei ang emaw chu!” an ti.

²¹ LALPAN a han hriat chuan a thinur a, Jakoba chungah chuan mei a thawh a, Israela chungah chuan a thinur chu a na ta hle a ni.

²²Pathian an ring lo va, A chhan theiin an ring hek lo.

²³Mahse, chung lam vân khi thu a pe a, Vân kawngkhârte a hawng a,

²⁴An ei atân mana a sûrtîr a, Vân chaw a pe ta a.

²⁵Mihring mai chuan vântirhkohte chaw an ei ta a, Hnianghnar taka ei tûr a pe a ni.

²⁶Khawchhak ata vâna thli a tlehtîr a, A thiltihtheihnain chhim thli a hâwntîr bawk.

²⁷Vaivut angin sa a sûrtîr a, Tuifinriat ṭiau anga tam sava a pe.

²⁸An bûk tualah a lo tla a, An chênna bûk bul maiah chuan.

²⁹Duh tâwkin an ei a, an tlai hle a, An châk ngei chu a pe a ni.

³⁰Sa ṭhial ṭawn ṭawn chungin Phunnawi an bâng chuang lo.

³¹Pathian an chungah chuan a thinur a, An ṭhalaite a thahsak a, Israel tlangvâl chhuanvâwrte chu an thi zo ta.

³²Chuti pawhin an sual lui zêl a, A thil mak tih an hmu na a, amah an ring duh chuang lo.

³³An dam chhûng nite chu ho takin a tiral a, An dam chhûng kumte pawh râpthlâk takin a liam.

³⁴A thah hnu chuan amah an zawng ṭan leh ta a, Sima ṭhahnemngaiin Pathian lam an hawi ta.

³⁵An himna lungpui chu Pathian a nih an hre chhuak a, Anmahni tlantu chu Chungnungbera a ni.

³⁶Mahse, an hmuiin an bum a, An leiin dâwt an hrilh bawk si.

³⁷An thinlung chu a nghet lo va. A thuthlungah an rinawm bawk hek lo.

³⁸Ani lah chuan a khawngaih a, An bawhchhiatna a ngaidam a, a tiboral lo, A thinur chu a insûm fo ṭhîn a, A thin thawk chu a che duh mai ngai lo.

³⁹Mihring chak lo an nih a hre reng a, Thli tleh liam ang lek hi an ni si a.

⁴⁰Thlalêrah khân an hel fo va, Ram rovah khân a thin an va tina zing em!

⁴¹Pathian an fiah an fiah mai a, Israel-te Mi Thianghlima chu an timangang.

⁴²A thiltihtheihzia kha an hre reng duh lo va, An hmêlmate laka a chhan laite kha an hre duh bawk hek lo.

⁴³Aigupta ram Zoan phaia A thil mak tih ropui tak kha an hre reng lo.

⁴⁴An luite chu thisenah a chantîr a, Lui tui tu man an in thei lo.

⁴⁵Thosi a puantîr a, a seh nek a, Chungu a tipung a, an ramah chuan a khat.

⁴⁶An thlaite chu khau rual a eitîr a, An hnathawh rah a ngêt zo bawk.

⁴⁷An grep hruite rialin a chhu chat a, An theipui kûngte chu vûrin a hmet hlum bawk.

⁴⁸An rante chu rialin a chhu hlum a, An ran rualte ṭêkin a dêng hlum bawk.

⁴⁹An chungah chuan a thinurna râpthlâk tak chu A leihbua a, a sawisa ta nek a, Chûng chu an chhiatna thlen tûra a tirh an ni.

⁵⁰A thinur hrîkthlâk nân an nun a zuah lo va, Hripui a lêntîr kha.

⁵¹Aigupta mite fa tîr chu a that vek a, An in chhûnga sei lian an vânglai fate chu.

⁵²A mite chu berâm angin a hruai chhuak a, Thlalêrah chuan a kalpui ta.

⁵³A hualhim a, hlauh rêng an nei lo va, An hmêlmate erawh chu tuiin a chîm pil ta.

⁵⁴A ram thianghlimah chuan a hruai thleng a, He tlângram, a kut ngeia a lâkah hian.

⁵⁵An hmaah chuan hnam dangte chu a hnawt chhuak a, Israel-te neih atân an ram chu a sem a, An inte chu an luah ta a.

⁵⁶Pathian, Chungnungbera an fiah leh a, an hel ta a, A thu hriattîr an zâwm duh lo.

⁵⁷An hawi kîr a, an pute ang bawkin vervêk takin an khawsa a, Thalngul kawi ang an ni, rin tlâk an ni ta lo.

⁵⁸Hmunsâng an siamte chuan an tithinur ta a, An milem chherte chuan a thin an titâwt.

⁵⁹Chûng chu a han hmuhin Pathian a thinur a, Israel-te chu a ten ta êm êm a.

⁶⁰Silo hmuna a chênna ṭhin chu a rauhsan ta a, Mihring zînga a chênna in ṭhîn chu.

⁶¹A chakna leh a ropuizia lanna Thuthlung Bâwm chu, Hmêlmate a mantîr a.

⁶²A mite chu khandaihin a sâmtîr a, A rochante chungah a thinur a ni.

⁶³Tlangvâlte chu an kâng hlum zo va, Nulate chuan pasal tûr an nei lo.

⁶⁴Puithiamte pawh khandaihin an that a, An nupuiten an ṭah ngam lo.

⁶⁵Mi chak, zu rui muhîl anga, Ngawi renga a awm chu a lo harh a.

⁶⁶Hmêlmate chu a ûm lêt a, A timualpho ta vek a ni.

⁶⁷Josefa thlahte chu a hnâwl ta a, Efraim hnamte chu a thlang ta lo,

⁶⁸Juda hnam chu a thlang ta a, A ngaihnat tak Zion tlâng nên.

⁶⁹Vâna a chênna ang hmun thianghlim chu a sa ta a, Nghet taka leia hûn angin Kumkhuaa awm tûrin a hûng nghet ta.

⁷⁰A chhiahhlawh Davida chu a thlang ta a, Ran rual vêng lai a la chhuak a.

⁷¹Berâm no hruai a enkawl lai chu, A rochan Israel-te leh Jakob-ho châwmtu atân a ruat ta a.

⁷²Theihtâwp chhuahin a enkawl a, Thiam takin a kaihruai ta a ni.