Read Mizo Lushai Sam 79 Bible Online

Sam 79 - Mizo Lushai bible

Sam 79

¹Aw Pathian, hnam dangini ram ro an rûn a, I tempul thianghlim pawh an tihbawrhbân tâk hi. Jerusalem khua chu a chim rem rum ta mai!

²I chhiahhlawhte ruang chu Mulukawlhte eiah an hnutchhiah a, I tâna inserhte sa pawh ramsate tlan atân.

³I mite thisen chu tui ang maiin an luantîr a, Jerusalem khawlaiah chuan a luang zuih a, Phûmtu tu mah an awm lo ve.

⁴Kan bula awmte chuan min diriam hle a, Kan vêla awmte chuan min nuihzatin min hmusit a.

⁵ LALPA, eng chen nge maw i thinur anga, I thinrim chu mei anga sa a nih reng dâwn?

⁶I thinur chu nangmah hre lo hnamte chungah, I hming lam lohna ramahte chuan leih rawh.

⁷Jakoba chhûngte chu an that zo va, An khuate chu an tiram zo ta.

⁸Kan pute sual mawh min phurhtîr suh la, I ngilneihzia han lantîr thuai ang che. Kan chan a chauh tak êm hi le.

⁹Min chhandamtu Pathian, min rawn pui la, I hming ropui avângin min chhandam la, I hming avângin min ngaidam rawh.

¹⁰Hnam dangte chuan engtizia nge “I Pathian chu khawiah nge?” min tih chhên le? I chhiahhlawhte thisen chhuahtu hnam chungah chuan, Kan hmuh ngeiah phuba han la ang che.

¹¹Lung in tângte rûm chu i hnên lo thleng sela, I chakna ropui chuan, thi tûra tihte chu chhan chhuak ang che.

¹² LALPA, kan chhehvêla chêngten an chêksawlhna che chu, A lêt sarih ngawtin rûl rawh.

¹³Keini hi zawng i ta kan ni, i rama tla i berâm rualte chu, Lâwmthu kan hrilh kumkhua ang che, Eng lai pawhin kan fak ang che.