Read Mizo Lushai Sam 80 Bible Online

Sam 80 - Mizo Lushai bible

Sam 80

¹Israel-te vêngtu, i beng lo chhi ang che, Berâm anga Josefa hruai ṭhîntu, lo ngaithla teh, Cherub-ho chunga ṭhu i hmêl êng chu:

²Efraim te, Benjamin te, Manase hnamte chungah chuan han tilang la, I chakzia chu han lantîr rawh.

³Aw Pathian, min din leh la, I hmêl êng chu min hmuhtîr rawh. Tichuan, kan him dâwn nia.

⁴Engkim LALPA, Pathian, eng chen nge I mite ṭawngṭaina hi i thinursan dâwn le?

⁵Chaw atân mittui i rintîr a, No lian puiin i intîr hi.

⁶Kan vêla awmte chuan neih tumin min chuh a, Kan hmêlmaten min nuihzat hi.

⁷Engkim Pathian, min din leh la, I hmêl êng chu min hmuhtîr rawh, Tichuan, kan him dâwn nia.

⁸Aigupta rama mi grep hrui bul i pawt chhuak a, Hnam dangte ûm chhuakin i phun ta a;

⁹A vêlte chu i thian fai a, Nghet takin zung a thlâk ta a, Ram pum a awh ta e.

¹⁰Tlângte a tihlim duai a, Sidar lian pui puiah a zâm lûk a,

¹¹Khawthlang tuipui a zâm kai a, Khawchhak luipui thlengin a zâm ta a.

¹²Engtizia nge a hungna pal i ṭhiah tâka, Veivâkte chuan a rah an lawh theih tâk hi le?

¹³Sanghalte chuan an nawr chhum a, Ramsate chuan an tlân.

¹⁴Engkim Pathian, kan lam lo hawi leh la, Vân aṭanga rawn thlîrin min han en la, I grep hrui hi han ngaihven teh.

¹⁵I kut ngeia i phun, I tân i chawrtîr hluah hluah kha a ni si a.

¹⁶Hmêlmaten min hâl a, min tan chhum a, I hmêl dur chuan tiboral rawh.

¹⁷I mi duhsaka chungah chuan i kut nghat la, Mihring fapa, nangin i tihchaka chungah ngei chuan.

¹⁸Tichuan, kan hawikîrsan lo vang che, Min tiharh la, i hming kan lam dâwn nia.

¹⁹ LALPA, Engkim LALPA, min din leh la, I hmêl êng chu min hmuhtîr rawh. Tichuan, kan him dâwn nia.