Read Mizo Lushai Sam 81 Bible Online

Sam 81 - Mizo Lushai bible

Sam 81

¹Min tichaktu Pathian fakin in aw chhuah rawh u, Jakoba Pathian chu fakin zai rawh u.

²Hla sa ula, benchhek kha khâwng rawh u, Perhkhuang leh ṭingṭang rimawite rem bawk rawh u.

³Thla tharah chuan tawtawrâwt hâm ula, Kût ni, thlahleinga zânah chuan.

⁴Hei hi Israel ramah chuan tih ṭhin tûr a ni, Jakoba Pathian thupêk a ni.

⁵Josefa thlahte tih tûra ruat a ni. Aigupta ram a fan lai khân, “Ka la hriat ngai lohte aw ka ngaithla a,

⁶An rit phurhte ka lâk kiansak a, An thil chawina kho pawh ka paihsak kha.

⁷Mangangin min au va, ka chhâng ta a, Khawpui rîkna, ka bihrûkna hmun aṭang ngei chuan. Meriba tui bula ka fiah che u kha,

⁸Ka mite u, ka zilhna hi ngaithla ula, Aw Israel, ka thu hi ngai ula ka va ti êm:

⁹Ram dang pathian be suh ula, Hnam dang pathian hmaah kûn hek suh u.

¹⁰Kei hi LALPA, in Pathian chu ka ni, Aigupta ram ata hruai chhuaktu che u ka ni. In kâ kha âng rawh u, ka châwm dâwn a che u.

¹¹Nimahsela, ka mite chuan ka aw an hre duh lo, Israel chuan engah mah min ngai ta lo.

¹²An luhlul êm êm a, An thu thuin ka awmtîr ta.

¹³Ka mite chuan ka thu hi ngaithlain Israel-te chuan ka kawng hi zawh teh sela aw!

¹⁴An dote chu ka han titlâwm ang a, An hmêlmate chungah ka kut ka thlâk thuai tûr.

¹⁵A hmaah chuan an dawl ang a, LALPA hawtute chu An chan a chau hlen ang.

¹⁶Buh tui berin ka châwm ang a, Lungpuia khawizu-in ka titlai tûr che u a ni.”