Read Mizo Lushai Sam 86 Bible Online

Sam 86 - Mizo Lushai bible

Sam 86

¹ LALPA, i beng chhi la, min chhâng ang che, Rethei leh pachhe tak ka ni si a.

²I tân ka inpe a, min vêng ang che, I chhiahhlawh hi chhanhim la, ka rin Pathian i ni.

³ LALPA, min khawngaih rawh, Nilêngin ka auh che hi.

⁴I chhiahhlawh hi min tihlim la, LALPA, i lamah ngawt ka lo hawi hi.

⁵ LALPA, nang chu i ṭha a, ngaihdam i peih reng a, I hming lamtu chungah chuan ngil i nei êm êm a ni.

⁶ LALPA, ka ṭawngṭaina i lo ngaithla ṭhîn a, Khawngaih dîla ka au i bengkhawn ṭhîn.

⁷Mangan laiin ka au che a, Min lo chhâng ṭhîn.

⁸ LALPA, nang ang Pathian an awm lo va, I thil tih ang tu man an ti thei lo.

⁹I siam hnam tinrêngte an lo kal dâwn, i hmaah an kûn ang, LALPA, i hming an chawimawi ang.

¹⁰Nang hi i ropui a, thil mak tam tak i ti, Nangmah chauh hi Pathian i ni.

¹¹ LALPA, i duhzâwng min zirtîr la, Rinawm takin ka awm dâwn nia, I hming ṭih reng tûrin thinlung thianghlim min pe ang che.

¹² LALPA, ka Pathian, Ka theihtâwpin ka fak ang che, I hming ka chawimawi kumkhua ang.

¹³Min lainatna a nasa a, Seol-a chhuk tûr min chhan chhuah hi.

¹⁴Aw Pathian, mi chapoten min rawn bei a, Mi râwng pui pui, nangmah pawisa lote chuan Min thah an tum.

¹⁵ LALPA, nang chu Pathian ngilnei tak leh zahngai thei tak i ni, Thinnel, khawngaihna leh rinawmna ngah i ni.

¹⁶Ka lam hi lo hawi la, min khawngaih rawh. I chhiahhlawh hi i chakna pe ve la, I chhiahhlawhnu fapa hi chhandam ang che.

¹⁷Ka chungah i ṭhatzia han tilang la, Min hawtuten hmu se, zak hle rawh se, Min ṭanpuia min thlamuan ṭhîntu chu LALPA, nang hi i ni.