Read Mizo Lushai Sam 88 Bible Online

Sam 88 - Mizo Lushai bible

Sam 88

¹Aw LALPA, min chhandamtu Pathian, Chhûnah ka au che a, zânah ka rawn pan che.

²Ka ṭawngṭaina i hnên lo thleng sela, Ka mangang au lo bengkhawn teh.

³Thil ṭha lo hi ka ning ta e, Ka thi ṭhelh ṭhelh a ni.

⁴Thlân khura liam tûrte anga ngaih ka ni a, Chhan tlâk ni tawh lo ang ka ni.

⁵Mitthi zînga chhiar tel, thlâna zalh tawh, Mitthi ang mai ka ni. Chûng mite chu i hre tawh lo va, Ṭanpui phâk pawh an ni tawh lo.

⁶Khur thûk tak mawngah chuan min dah ta a, Hmun thim thûk takah chuan.

⁷I thinurna chuan min delh tlat a, Min vaw na êm êm a ni.

⁸Ka ṭhiante min lâk sawnsak daih a, An tân tenawm ka ni ta a, Min khuahkhirh tlat a, ka vâk chhuak thei lo.

⁹Ka tuar a na êm a, ka mit a vai zo va, LALPA, ni tinin ka au che a, I lamah ka kut ka phar fo ṭhîn.

¹⁰Mitthite tân thil mak i tihsak ngai em ni? An lo thovin an fak dâwn che em ni?

¹¹Thlâna zalh tawhte chuan i ngilneihzia an hril theiin, Chhiatna tâwk tawhte chuan i rinawmzia an puang thei dâwn em ni?

¹²Hmun thimah chuan i thiltih mak hmuh theih em ni? Hriat reng tawh lohte ramah chuan I dikzia hi hriat phâk em ni?

¹³Aw LALPA, kei chuan ka au che a, Tûk tin ka ṭawngṭai ṭhîn.

¹⁴ LALPA, engati nge min thlauhthlâka, Ka lakah hian i hmêl i thup tâk hi?

¹⁵Ka tleirâwl chhuah ata hrehawm ka tuar reng a, Ka thi lek lek ṭhîn a, I ṭihbaiawmna chuan ka thauvah hian min man a.

¹⁶I thinur chuan min nuai ṭhîn a, Nangmah hlauvin ka chau chhe ta.

¹⁷Tui lian angin ni tin min chîm reng a, Min hual vêl tlat ṭhîn a.

¹⁸Ka ṭhian bul leh ka lainate min lâk sawnsak daih a, Thim hi ka ṭhian ber a ni ta.