Read Mizo Lushai Sam 89 Bible Online

Sam 89 - Mizo Lushai bible

Sam 89

¹ LALPA, i ngilneihzia zaiin ka chawi ang a, I rinawmzia ka hril kumkhua bawk ang.

²I ngilneihna a hlun dâwn tih ka hria, I rinawmzia lah vân anga nghet a ni.

³‘Ka mi thlan hnênah thu ka thlung a, Ka chhiahhlawh Davida hnênah thu ka tiam kha.

⁴A thlahte chu lal an ni zêl ang a, An thlah zêlte pawh chuan i lalṭhutthlêng an luah zêl ang.’

⁵ LALPA, vânten i thil mak tih an aupui a, Mi thianghlimte pung khâwm zîngah i rinawmzia an fak.

⁶ LALPA, vânah nangmah tluk hi tu mah an awm lo va, LALPA ang hi vân mite zîngah tu nge awm?

⁷Mi thianghlimte awm khâwm zîngah Pathian hlauhawm tak i ni, I bula awmte tân Pathian ṭihbaiawm tak i ni.

⁸ LALPA, Engkim Pathian, nang anga thiltithei tu nge awma, LALPA, rinawmnaa khat tu dang nge awm?

⁹Tuifinriat so bulh bulh chungah ro i rêl a, A fâwnte chu i hau reh ṭhîn.

¹⁰Rahab chu i vua a, a thi dêr mai, I bân chakin hmêlmate chu i vai darh ta.

¹¹Vân khi i ta a ni a, lei pawh hi i ta a ni, Lei leh a chhûnga awm zawng zawng hi i siam a ni.

¹²Chhim leh hmâr i siam a, Tabor leh Hermon tlâng i hming fakin an au.

¹³I bân tha chu a va chak êm! I vei lam pawh chak tak a ni, I ding lam chu a chak lehzual.

¹⁴Dik taka tih leh rorêlna fel hi I lalṭhutthlêng nghahchhan a ni. Ngilneihna leh rinawmnain hma i la ṭhîn.

¹⁵ LALPA, nangmah faka zai nachâng hriate chu an nihlawh e, I hmêl ênga lêng ṭhînte chu.

¹⁶Nilêngin i hming vângin an lâwm ṭhîn a, I dik êm avângin an hlim takmeuh ṭhîn a ni.

¹⁷Ropui taka hnehtîrtu i ni a, I duhsakna avângin an chak zâwk ṭhîn a ni.

¹⁸Kan phaw hi LALPA ta a ni, Kan lal pawh hi Israel Mi Thianghlima ta a ni.

¹⁹Nangmah ngaihsaktu hnênah zêlin thu i sawi a, “Pasalṭha tân ṭanpuitu ka siamsak a, Mipui zînga ka duha chu ka chawisâng ta.

²⁰Ka chhiahhlawh Davida ka chhar ta a, Hriak thianghlim chu ka thih ta e.

²¹Ka chaknain ka thuam ang a, Ka thiltihtheihna chuan a tichak ang.

²²Hmêlmate chu a chungah an inlek ngam lo vang, Mi sualte chuan an timangang hek lo vang.

²³A hmêlmate chu ka vaw nek ang a, A hawtute ka vuak chauhsak bawk ang.

²⁴Ka ngilneihna leh rinawmna a chungah ka tilang ang a, Ka hming avângin hnehtu ka nihtîr ang.

²⁵Tuifinriatah khuan thu a nei ang a, Luipui thleng khian a lal bawk ang.

²⁶Ani chuan, ‘Ka Pa, ka Pathian i ni a, min humtu lungpui, Min chhandamtu i ni,’ min la ti ang.

²⁷Keiin fa tîrah ka neih ang a, Khawvêla lal ropui berah ka siam bawk ang.

²⁸A chungah ngil ka nei kumkhua ang a, Ka thuthlung pawh ka vawng tlat ang.

²⁹A thlahte chu ka laltîr zêl ang a, A ram chu vân awm chhûng chuan a kin lo vang.

³⁰A fate chuan ka Dân hi an pawisak lohva, Ka duh anga ro an rêl duh lohva,

³¹Ka thutak an ngaihnêpa, Ka thupêkte an awih loh chuan,

³²An sual avângin tiangin ka vua ang a, An bawhchhiatna avângin ka sawisa ang.

³³Mahse, ka ngilneihna a dai hlen chuang lo vang a, Ka rinawmzia a nêp chuang hek lo vang.

³⁴Ka thuthlung chu ka bawhchhe lo vang a, Ka sawi tawh chu ka tidanglam hek lo vang.

³⁵Ka hming chhâla ka tiam tawh ang khân, Davida chu ka thlahthlam ngai lo vang.

³⁶A thlahte chu eng lai mahin an mang lo vang a, Ni khi a awm chhûng chu a ram ka tungding ang.

³⁷Vâna thla a awm chhûng chu A ram a kin lo vang,” tiin.

³⁸I hriakthiha chungah nang chu i thinur a, I hawisan a, i thlauhthla a.

³⁹I chhiahhlawh hnêna i thuthlung chu i palzût a, A lallukhum leiah i paihsak ta.

⁴⁰A khaw kulh bangte chu i ṭhiahsak a, A kulhbîng chu a chim ta a.

⁴¹A fang apiangte chuan an duh duh an la a, Khaw ṭhenawmte nuihzat a ni ta e.

⁴²Amah dotute chu i tichak a, A hmêlma zawng zawng i tihlim ta.

⁴³A khandaih chu i tibil a, Inbeihnaah a chak i phal hek lo.

⁴⁴A ropuina i lâksak a, A lalṭhutthlêng leiah i paih thla dêr.

⁴⁵A tlangvâl chhûng i tihtawisak lehnghal a, Zakin a kun tlawk tlawk a ni.

⁴⁶ LALPA, eng chen nge i bihrûk reng dâwna, I thinur chu mei anga a alh dâwn le?

⁴⁷Ka dam chhûng tawizia hi hre reng ang che, Mihringte hi thi mai theiin i siam si a.

⁴⁸Mihring piang tawh tu nge thi lo tûr awm? Tu nge Seol pumpelh thei ang?

⁴⁹ LALPA, tûn hma lama i ngilneihnate leh Davida hnêna rinawm i tiamte kha khaw nge ni ta?

⁵⁰ LALPA, i chhiahhlawh an thamlohzia hi hre reng ang che. Mi tam takin min sawichhiat hi theihnghilh lul suh.

⁵¹ LALPA, i hmêlmaten i hriakthih hi an hmusit a, A kalna apiangah an nuihzat zui.

⁵² LALPA chu fak kumkhua rawh u; Amen, Amen.