Read Mizo Lushai Sam 9 Bible Online

Sam 9 - Mizo Lushai bible

Sam 9

¹ LALPA, theihtâwpin ka fak ang chia; I thil mak tih zawng zawng ka hril vêl ang.

²Nangmah vângin hlimin ka lâwm ang a, Aw Chungnungber, i hming fakin ka zai bawk ang.

³I hmaah chuan ka hmêlmate an tlânchhia a, An tlu a, an boral zo ta e.

⁴Rorêltu dik, lalṭhutthlênga ṭhu-a chuan, Ka chungthu chu dik takin i rêl si a.

⁵Hnamte zilhin mi suaksualte chu i tiboral a, Kumkhua atân an hming thai bo vang che.

⁶Hmêlmate chu tihchhiat dêr an ni a, An khuate chu a ram zo va, Tu man an hre tawh lo.

⁷ LALPA erawh hi zawng chatuana lal a ni a, Rorêl tûrin a lalṭhutthlêng a hûng nghet ta.

⁸Dik takin khawvêlah ro a rêl ṭhîn a, Mi tin chungah rual takin a rêl ṭhîn.

⁹Hnehchhiahte tân LALPA chu himna kulh a ni a, Mangan huna inhumhimna kulhbîng a ni.

¹⁰I hming ngainatute rinchhan i ni a, LALPA, nangmah zawngtute chu I thlahthlam ngai si lo.

¹¹Zion-a ṭhu LALPA tân chuan fak hla sa ula, Mite hnênah a thiltihte chu puang rawh u.

¹²Thisen phuba lâksaktu chuan a ngaihven a, a hre reng ṭhîn a, Tuartute au thâwm a ngaihthah ngai hek lo.

¹³Aw LALPA, min khawngaih la, Min hawtute laka ka tuar tamzia hi en teh: Thihna kawngka ata hi mi la chhuak ang che.

¹⁴Zion fate kulh kawngkaahte chuan ka fak chhan che ka sawi theiha, Min chhandamna ka chawimawi theih nân.

¹⁵Hnamte chu anmahni hum laihah chuan an tla a, An lên zâr rûkah chuan an kete chu a âwk ta a.

¹⁶Dik taka rorêlin LALPA chu a inhriattîr a, Mi suaksualte chu anmahni thiltihah ngei an âwk ṭhîn.

¹⁷Mi suaksualte chu Seol-ah an chhuk ang a, Pathian ngaihthahtu hnamte nên.

¹⁸Mangangte chu thlahthlam an ni fo lo vang a, Retheite beisei pawh a bo hlen hek lo vang.

¹⁹Aw LALPA, lo tho teh, mihringin ngam che suh se, Hnamte chungah ro han rêl ang che.

²⁰ LALPA, anniho hi han tithlabâr la, Hnam tin hi mihring mai an nihzia hriattîr ang che.