Read Mizo Lushai Sam 90 Bible Online

Sam 90 - Mizo Lushai bible

Sam 90

¹Hmasâng ata, LALPA, Nang chu kan chênna in i ni.

²Tlângte a din chhuah hma, Lei leh khawvêl a pian hma daih tawh khân, Nang chu chatuan chatuana awm Pathian i ni.

³‘Hringfate u, kîr tawh rawh u,’ i han tih chuan, Leiah an kîr mai ṭhîn.

⁴I ngaihah chuan kum sâng pawh hi Nimin ral ta ang chauh kha a ni a, Zân vên khat ang lek hi a ni.

⁵Tui lian angin i hnâwl liam a, Ṭhangkhat mu ang lek hi a ni. Zînga hnim chawr ang hi a ni.

⁶Zîngah a lo chawr a, a lo pâr a, An han sâm a, tlaiah a vuai mai ṭhîn.

⁷I thinurna chuan min tichau dêr a, I thin a rim avângin kan mangang chhe ṭhîn.

⁸Kan bawhchhiatnate chu i hmu vek a, Kan sual tih rûkte pawh i hmu thei reng a ni.

⁹Kan dam lai nite chu i thinurna avângin a tla thuai a, Kan dam chhûng kumte chu a thâmral ṭhîn.

¹⁰Kan dam chhûng chu kum sawmsarih emaw a ni a, A chak deuh chu kum sawmriat pawh an dam. Mahse, kan dam rei leh a hahthlâk thlâwn mai a, A ral thuai a, kan bo ta vang vang ṭhîn.

¹¹I thinur natzia hi tu nge hre phâk? Nangmah ṭih tûr anga hlau che tu nge awm?

¹²Kan dam chhûng ni tlêmzia min zirtîr la, Kan lo fin zâwk theih nân.

¹³ LALPA, engtikah nge i lo lamlêt ang? I chhiahhlawh hi rawn hnêm ta che:

¹⁴I ngilneihna nasa tak chuan zîngah min titlai la, Kan dam chhûngin hlim takin kan zai tawh ang.

¹⁵Hrehawm leh thil ṭha lo min tuartîr chenin Min tihlim leh ang che.

¹⁶I chhiahhlawhten i thiltihte hmu sela, An fate chuan i ropuizia hmu bawk rawh se.

¹⁷ LALPA, kan Pathian mawizia hi kan chungah lang sela, Kan kut hnathawhte hi tinghet la, Kan kut hnathawhte hi malsâwm ang che.