Read Mizo Lushai Sam 91 Bible Online

Sam 91 - Mizo Lushai bible

Sam 91

¹Chungnungbera thla hnuaia chênga, Engkimtitheia hlima awm chuan,

²“LALPA, ka tlûkluhna, ka himna kulhpui, Ka Pathian, ka rin chhan ber i ni,” a ti ngei ang.

³Thang ata chu a chhan chhuak ang che a, Hripui hlauhawm lakah a hum ang che.

⁴I chungah chuan thla a zâr ang a, A thla hnuaiah i tlulût ang, Rinawm takin a vêng ang che a, a hum ang che.

⁵Zâna thil hlauhawmte, Chhûna thal lêng ṭhînte i hlau lo vang.

⁶Thima hri lêng ṭhîn leh Chhûna lêng ṭhîn chhiatna i hlau hek lo vang.

⁷Sâng têl i sîrah an tluin I vêlah chuan sîng têl thal phung mah se, A khawih ve hauh lo vang che.

⁸I mit zawngin i hmu ngei ang, Mi sual chunga phuba lâk chu a hmuhin i hmu chauh vang.

⁹I tlûkluhna chu LALPA a ni a, Chungnungbera bula chêng i nih hi.

¹⁰Thil ṭha lo chuan a nang lo vang che a, I awmnaah hri chhia a lo hnai lo vang.

¹¹I kalna apianga vêng tûr chein Vântirhkohte chu a tîr ang a;

¹²An kutin an dâwm ang che a, Lungah i ke i chhuih lo vang.

¹³Sakeibaknei leh rûl i rap ang a, Sakeibaknei vânglai leh rûlngân i chîl bawk ang.

¹⁴Min ngainat êm avângin ka chhan ang che, Ka hming a pawm tâk avângin ka chawisâng ang.

¹⁵Min au vang a, ka lo chhâng ang, A mangan leh ka awmpui ang a, Ka chhan chhuak ang a, ka chawimawi ang.

¹⁶A duh chen chen a dam ka phal ang a, Ka chhandamna ka hmuhtîr ang.