Read Mizo Lushai Sam 92 Bible Online

Sam 92 - Mizo Lushai bible

Sam 92

¹ LALPA hnêna lâwmthu hrilhi a va ṭha em! Aw Chungnungber, i hming faka zai te,

²Tûk tin i ngilneihzia hril te, Zâna i rinawmzia puan te,

³Ṭingṭang hrui sâwm nei leh perhkhuangte leh, Bengbung rimawite nêna fak che hi a va nuam êm!

⁴ LALPA, i thiltihin min tihlim a, I kut hnathawh lâwmin ka au.

⁵I thiltih chu, LALPA, a va ropui tak êm! I ngaihtuahte chu a va thûk êm!

⁶Hêng hi mi nazawngin an man pha lo, Mi â-te hriat rual lah a ni hek lo.

⁷Mi suaksualte chu hnim angin an chawr hluah hluah a, Thil sual titute pawh an vul hle si ṭhin hi; Mahse, boral vang vang tûr an ni si.

⁸Nang erawh chu, LALPA, Kumkhuaa chungnung ber i ni.

⁹Ngai teh, LALPA, i hmêlmate, Nangmah dotute chu an boral ang; Thil sual titute pawh an darh vek ang.

¹⁰Sele pachal angin mi tichak a, Hriak thar min thih bawk a;

¹¹Min châng rutute lah ka hmu thei zêl a, Mi sual, min beitute thâwm pawh ka hre thuai ṭhîn.

¹²Mi dikte chu tûmthing angin an duah ang a, Lebanon tlâng sidar angin an ṭhangduang ang.

¹³ LALPA ina phun, kan Pathian in tuala awm tate chu an chawr hluah hluah ang a,

¹⁴Upa hle mah sela, an rah thliah thluah ang a, An tuaiin an hring hluah ang.

¹⁵Min humtu LALPA chu mi ngîl a ni a, Sualna rêng rêng a nei lo tih an hril ṭhîn ang.