Read Mizo Lushai Sam 94 Bible Online

Sam 94 - Mizo Lushai bible

Sam 94

¹ LALPA, phuba latu Pathiani ni, Phuba latu Pathian, lo lang tawh rawh.

²Lei chungah hian ro han rêl la, Chapote chu an phu tâwkin han thungrûl rawh.

³ LALPA, mi sualte hi Eng chen nge an inchhuan dâwn le?

⁴Chapo takin an ṭawng thâwr thâwr ṭhîn a, Thil sual titu zawng zawngte chu an uang hle ṭhîn.

⁵ LALPA, i mite hi an sawisa nek a, I rochante an tiduhdah.

⁶Hmeithaite leh kan zînga hnam dangte, Fahrahte pawh an that zêl mai.

⁷“LALPAN a hmu lo vang, Jakoba Pathian chuan a ngaihsak lo vang,” an ti.

⁸Mi mâwlte u, ngaihtuah ngun hle ula, Mi â-te u, engtikah nge in fin ang aw?

⁹Beng siamtu chuan a hre thei dâwn lo vem ni le? Mit siamtu chuan a hmu thei lo vang maw?

¹⁰Hnam tin thununtu chuan a hrem thei lo vang maw? Mihring zirtîrtu chuan hriatna a nei lo vang maw?

¹¹ LALPAN an ngaihtuahte chu a hre vek a, Engmahlo mai a nih a hria.

¹² LALPAN mi a thununte leh A Dân a zirtîrte chu an nihlawh e.

¹³Hmêlma lakah rilru hahchawlhna a pe ṭhîn, mi sualte tlâkna tûr hum laih a nih laiin.

¹⁴ LALPAN a mite chu a kalsan ngai lo va, A rochante chu a thlahthlam ngai hek lo.

¹⁵Mi felte tân rorêlna dik a awm leh ang a, Thinlung ngîlte pawhin an ṭâwmpui ang.

¹⁶Mi sual laka min chhan tûrin tu nge lo ding chhuak ang? Thil sual titu lakah tu nge min rawn ṭan ang?

¹⁷Min ṭanpuitu chu LALPA ni suh sela chuan, Ngawih vang vangna ramah ka kal daih tawh âwm e.

¹⁸Ka tlu dâwn emaw ka tih laiin LALPA ngilneihna chuan min chelh ṭhîn.

¹⁹Ka mangan êm êm laite chuan Min thlamuan a, min tihlim ṭhîn.

²⁰Rorêlna dik lo chu i ngaithei lo, Dik lo taka rêl hi tih dân tûra neih ṭhîntu nên,

²¹Mi dikte nun lâk tuma beia, Pawi khawih lo a rûka thiam loh chantîrtu chu.

²² LALPA chu min humtu a ni, Ka Pathian chu ka tlûkluhna lungpui a ni.

²³An suahsualna avângin a nuai bo vang; LALPA, kan Pathian chuan a tiboral vek ang.