Read Mizo Lushai Sam 96 Bible Online

Sam 96 - Mizo Lushai bible

Sam 96

¹ LALPA fakin hla sa ula, hlathar sa rawh u, Leia mi tinrêngin LALPA fakin hla sa rawh se.

² LALPA chawimawia hla sa-in, a hming fak ula; Min chhandamna thu lâwmawm hi ni tin puang rawh u.

³Hnam tin hnênah hril darh ula, Mi tin hnênah a thil mak tih chu puang rawh u.

⁴ LALPA chu a ropui a, fak chiam tûr a ni, Pathian dang zawng aiin ṭih tûr a ni.

⁵Hnam dang pathiante chu a lem mai an ni a, LALPA hi zawng vân siamtu a ni e.

⁶Ropuina leh chawimawina chuan a hual vêl a, Thiltihtheihna leh mawina chu a Hmun Thianghlimah a awm.

⁷Khawvêl hnam tinrêngte u, LALPA chawimawi ula, LALPA ropuina leh chakna chu fak rawh u

⁸ LALPA hming ropui chu fak fo ula, Thilpêk kengin a inah lo haw rawh u.

⁹Thianghlim leh mawi taka inthuamin,. LALPA hmaah lo kûn rawh u, Leia chêng zawng zawng pawh hlauvin khûr rawh se.

¹⁰Hnam tin hnênah, “LALPAN ro a rêl e,” ti rawh u, Nghîng lo tûrin lei hi a hûng tlat a, Mi tin chungah dik takin ro a rêl dâwn.

¹¹Vânte u, hlim ula, lei pawh hi lâwm rawh se, Tuifinriat leh a chhûnga awmte chu au dur dur rawh se.

¹² LALPA hmaah chuan Lo leh a chhûnga awm zawng zawng hi Lâwm takin awm sela, Ngaw thing zawng zawngte chu Hlimin au hluah hluah bawk rawh se.

¹³ LALPA chu lei chungah rorêl tûrin a lo kal e, Khawvêl chungah dik takin ro a rêl ang a, Rinawm takin mi tinrêng thu a rêlsak dâwn si a.