Read Mizo Lushai Thufingte 1 Bible Online

Thufingte 1 - Mizo Lushai bible

Thufingte 1

¹Israel lal Davida fapa Solomona thufing hi:

²Miten finna leh kaihhruaina dik an hriata, Thu rilte an hriat fuh theih nân a ni.

³Hmangchâng hriaa, thil dik tih leh rorêl thiamna neiin Tluang taka nung tûrin a kaihruai ang.

⁴Mi mâwlte chu a tifingvâr ang a, Tleirâwlte pawhin fîmkhur dân an hria ang.

⁵Mi fingten ngaithla se an fing sawt ang, Hre zaute chuan chinchâng an hriat belh ang.

⁶Thufing inthupte hrethiamin, Mi fing thu ril leh thu khirh an hre thei ang.

⁷ LALPA ṭih hi hriatna thûk ber a lo ni, Mi â-te chuan finna an hmusit a, Kaihhruai theih an ni lo.

⁸Ka fapa, i pa kaihhruaina ngaithla la, I nu thu zirtîr che pênsan hauh suh.

⁹Diar mawi tak khima, Ṭhi mawi tak awrh angin I nun a timawi ang.

¹⁰Ka fapa, mi sualten an thlêm hunah che An thu zâwm suh ang che.

¹¹‘Ti rawh, thah tûr i zawng ru ang, Pawi sawi lo pawh ni se a rûkin bei mai ila,

¹²A nung chunga phûm ang mai leh Seol-a chhuk tate angin i awmtîr ang,

¹³Thil hlu tak kan lâksak ṭeuh vang a, Kan thil lâk chu inah kan chhêk dâwn nia,

¹⁴Kan zîngah tel ve la Kan inṭawm vek dâwn nia,’ an tih che chuan,

¹⁵Ka fapa, an zîngah chuan tel ve hauh suh, An kawngah chuan pên lût hek suh.

¹⁶Thil sual ti tûr chuan an tlân chak hle a, Thisen chhuah pawh an nghâkhlel êm êm ṭhîn.

¹⁷Savaten an hmuh reng laia, An awhna tûr lên zâr a sâwt lo,

¹⁸Hêng mite erawh hi chu mahni awh nâna thang kam an ni, An awh hlum nâna kam ru an ni.

¹⁹Chutiang chu suamhmangte awm dân tûr chu a ni, An nun an chân ngei ang.

²⁰Kawtthlêrahte leh tual zau laiahte, Finna chu a au va,

²¹Mipui lunna laiahte pawh a au bawk a, Kulh kawngkhâr bulahte thu a sawi ṭhîn.

²²‘Mi mâwlte u, mâwl reng in duh em ni, Eng chen nge finna hi in hmuhsit anga, Mi â pawhin hriatna hi a hmuhsit ang?

²³Ka zilhna hi rawn ngaihven ṭha ula, Tihtakzetin thu ka hrilh ang che u. Ka thu ka hriatthiamtîr dâwn a che u.

²⁴Ka ko che u a, in chhâng duh lo, Bân ka phar a, in pawisa lo.

²⁵Ka remruat apiang in ngaihsak duh lo va, Ka zilhna chu in pawm duh bawk hek lo.

²⁶In vânduaiin kei chu ka nui ang a, In râlkhêl hunah chuan ka nuihzat ang che u.

²⁷Thlipui anga hlauhawm a lo thawhin, Ṭhâwngaleivir anga vânduainain a nuai che uin, Manganna leh hrehawmna in tuar hun chuan,

²⁸Min au vang a, ka chhâng lo vang che u, Min zawng min zawng ang a, min hmu lo vang.

²⁹Hriatna in hua a, LALPA ṭih in tum si lo.

³⁰Ka remruat chu in pawisa duh lo va, Ka zilhna apiang chu in hmusit a,

³¹In awm dân rah chu in seng ngei dâwn, In remruat chu in kham hlui ang.

³²Mi mâwlte chu an lêlohna avângin an thi ang a, Mi â-te chu an ngaihsam avângin an chhe bawk ang.

³³Ka thu ngaithlatute erawh chu him takin an awm ang a, Thil ṭha lo hlau lovin thlamuang takin an awm ang.