Read Mizo Lushai Thufingte 11 Bible Online

Thufingte 11 - Mizo Lushai bible

Thufingte 11

¹Bûkna dik lo chu LALPA tenzâwng tak a ni a, Bûklung dik erawh chu a lawmzâwng tak a ni.

²Chapote chu an mualpho thuai dâwn a, Inngaihtlâwm hi a fing zâwk e.

³Mi ngîlte chu rinawmnain a kaihruai a, Bum hmangte erawh chu an sualnain a tichhia ang.

⁴Hausak hi thinurna ni-ah chuan a ṭangkai lo va, Dikna erawh chuan thihna ata a chhan chhuak ang che.

⁵Mi ṭhate chu an dik avângin an kawng a tluang a, Mi sualte erawh chu an sualnain a tichhe ṭhîn.

⁶Mi ngîlte chu an diknain a chhan ṭhîn a, Bum hmangte erawh chu an châknain a man tlat ṭhîn.

⁷Mi sualte an thihin beisei tûr a awm tawh lo, Hausaknaa innghah hi sâwtna a awm lo ve.

⁸Mi dikte chu manganna ata chhan chhuah an ni a, Mi sualte chungah a thleng thung ang.

⁹Serh leh sâng nei lote thu sawi chuan an ṭhiante a tichhe ṭhîn a, Mi fingte chu an finnain a chhan chhuak ṭhîn.

¹⁰Mi dikte an tluan chuan khua an lâwm a, Mi sualte an tlâwm chuan lâwmin an au chiam ṭhîn.

¹¹Mi ngîl zârah khua a mawi a, Mi sual ṭawngin a tihmingchhia.

¹²Mi dang hmuhsit hi a âtthlâk a, Mi fing erawh chu a ngawi mai ṭhîn.

¹³Mi kamtam chuan thurûk a zêp thei lo va, Rin tlâkte erawh chuan thu an zêp thei ṭhîn.

¹⁴Kaihruaitu ṭha an awm loh chuan mite an tlu ṭhîn a, Remruat thiam an tam chuan an him ṭhîn.

¹⁵Hriat chian loh tâna dahkhama ṭan chu inchhîrawm tak a ni, Ṭan loh law law a hahdamthlâk zâwk.

¹⁶Nu ngilnei chuan chawimawi a hlawh a, Hmeichhe sual chu zahpuiawm tak a ni. Mi thatchhia chu a hausa ngai lo vang a, Mi hrât tak erawh chu a hausa ang.

¹⁷Mi ngilnei chuan a ngilneihna a hlâwkpui a, Mi nunrâwng chu amah a intichhe ṭhîn.

¹⁸Mi sual thiltihah hlâwkna rêng a awm lo va, Mi dik thil tih erawh chu a hlâwk ngei ang.

¹⁹Thil dik tih tum tlatte chu an nung ang a, Thil sual ûmtute chu an tlu ngei ang.

²⁰ LALPAN rilru kawi a ten a, Rilru ngîlte erawh chu a ngaina.

²¹Mi sual chuan hrem a pumpelh hauh lo vang a, Mi dikte erawh chuan an pumpelh ngei ang.

²²Nula hmêlṭha fîmkhur nachâng hre lo chu Vawk hnâra rangkachak khâng vuah ang hi a ni.

²³Mi dikte duhthusâm chu thil ṭha hlîr a ni a, Mi sualte hmabâk chu Pathian thinurna tuar a ni.

²⁴Sem darh chîn chu ngah lehzualna a ni, Mi kawm tak nih chu tlâkchham ngahna a ni.

²⁵Thilphal hle la, i hausa ang, Mi ṭanpui la, an ṭanpui ve ang che.

²⁶A to nghâka buh chheprelhtu chu ânchhia an lawh ang a, Phal taka hralh zêltu chu miin an fak ang.

²⁷Thil ṭha i duh tlat chuan duhsakna i dawng ang. Thil sual i zawn chuan i tawng ngei ang.

²⁸Hausakna rinchhante chu hnah angin an ṭîl ang a, Mi dikte erawh chu an duah hluah ang.

²⁹Mahni chhûngkaw tibuaitu chuan eng mah a nei lo vang, Mi â-te chu mi fing chhiahhlawh an ni ang.

³⁰Dikna rah chu nunna a ni a, Nunrâwn chu thihna a ni.

³¹Khawvêlah mah mi dikten lâwmman an dawn chuan Thil sual titute leh mi sualte chuan hrem an tuar ngei ang.