Read Mizo Lushai Thufingte 12 Bible Online

Thufingte 12 - Mizo Lushai bible

Thufingte 12

¹Kaihhruaina ngaina chuan hriatna a ngaina a, Thununna hawtu chu a â hle a ni.

²Mi ṭhate chu LALPAN a duhsak a, Sual tih chîngte thiam loh a chantîr ang.

³Sual avângin tu mah an dingchang lo vang a, Mi dikte erawh chu an nghîng lo vang.

⁴Nu ṭha chu a pasal tân lallukhum a ni a, Pasal timualphotu chu ngalngêt ang hi a ni.

⁵Mi dikte chuan thil dik an ngaihtuah a, Mi sualte remruat chu bumna hlîr a ni.

⁶Mi sualte kam chhuak chu tual thah thu a ni a, Mi ngîlte thu chuan mi a chhanhim ṭhîn.

⁷Mi sualte chu an tluchhia a, an boral a, Mi dik chhûngkua chu an dingchang ang.

⁸Mi an fin leh fak an hlawh ṭhîn a, An ât leh an hmusit ṭhîn.

⁹Intihmilena ei tûr tlâkchham ai chuan, Mahni hna thawka mi narân nih a ṭha zâwk.

¹⁰Mi dikte chuan an rante lam an khawngaih a, Mi sualte erawh chu an nun a râwng a ni.

¹¹Mahni lo enkawltu chuan ei tûr a ngah ṭhîn a, Eng mah ni hlei lo ûm ruak ruak hi a âtthlâk e.

¹²Mi sualte kulh chu a chhe ṭhîn a, Mi dikte erawh chuan nghet takin zung an kaih ṭhîn.

¹³Mi sual chu amah a inṭawngâwk ṭhîn a, Mi dik erawh chuan buaina a pumpelh ṭhîn.

¹⁴Ṭawnghmang thiam miin a thiam man a tlai phah ang a, A thil tih rah a seng bawk ang.

¹⁵Mi â chuan dik a inti hle ṭhîn a, Mi fingte erawh chuan thurâwn an ngaichâng ṭhîn.

¹⁶Mi â lungni lo chu a lang nghâl ṭhîn a, Mi fing chuan chêksawlhna a ngaihthah ṭhîn,

¹⁷Mi rinawm chuan thu dik a sawi ṭhîn a, Thuhretu der chuan dâwt a sawi ṭhîn.

¹⁸Ṭawng thlahdah hian ngûnhnâm angin mi a chhun na thei a, Mi fing thu erawh chuan mi a thawi dam ṭhîn.

¹⁹Thu fing chuan a daih rei a, Dâwt erawh chuan rei lo tê chauh a daih.

²⁰Thil ṭha lo tih tumtuten mahni an inbum a, Remna zawngtuten hlimna an chang.

²¹Mi dikte chu thil ṭha lovin a tlâkbuak lo, Mi sualte erawh chuan manganna an tâwk ṭhîn.

²² LALPAN dâwt hmang a ten a, Rinawm taka thil ti ṭhîn erawh chu a ngaina.

²³Mi fîmkhur chuan a hriatzia a thup a, Mi chhawihte erawh chuan an âtzia an târlang.

²⁴Taima apiangin thu an nei ang a, Thatchhiate erawh chu chhiahhlawh an ni mai ang.

²⁵Lungkham neih avângin mi an ngui a, Thu ṭha erawh chuan mi a tihlim ṭhîn.

²⁶Mi dik chu a ṭhiante kaihruaitu a ni a, Mi sualte kawng erawh chu bona a ni.

²⁷Mi thatchhia chuan a duhzâwng a nei ngai lo vang a, Taima erawh chu a pung thûr thûr ang.

²⁸Dikna hi nunna kawng a ni a, Chumi kawngah chuan thihna a awm lo.