Read Mizo Lushai Thufingte 13 Bible Online

Thufingte 13 - Mizo Lushai bible

Thufingte 13

¹Fapa fing chuan a pa kaihhruaina a zâwm a, Pawisak nei lo chuan zilhna a ngaithla duh ṭhîn lo.

²Mi ṭha chuan a ṭhat man a chên ang a, Bum hmang chuan râwng taka chêt hi a nuam tihzâwng a ni.

³Ṭawng fîmkhur hi mahni invênna a ni a, Mi ṭawng tlahawlh chuan ama chhiatna a thlen ṭhîn.

⁴Mi thatchhiain eng mah a nei lo; Mahse, a vîr êm êm, Mi taima erawh chuan a nei le lu ṭhîn.

⁵Mi dik chuan dâwt thu a hua a, Mi sual thu erawh chu a tenawm a, a zahpuiawm.

⁶Dikna chuan pawi sawi lote a vêng tlat a, Suahsualna erawh chuan mi sualte chhiatna a thlen ṭhîn.

⁷Hausa hlea inngai eng mah nei lo an awm a, Pachhiaa inngai hausa hle an awm bawk.

⁸Hausa chuan intlanna tûr sum a nei a, Pachhia erawh chuan vau a tâwk ve lo.

⁹Mi dikte chu mei êng tak ang an ni a, Mi sualte chu khâwnvâr tihmih ang an ni.

¹⁰Chapona chuan inhauna a tichhuak ṭhîn a, Mi râwn ṭhin hi a finthlâk zâwk a ni.

¹¹Awlsam taka sum neih chu a ral thuai a, Harsa taka thawh chhuah chu a pung zêl ṭhîn.

¹²Beisei a bo chuan thin a na a, Duh anga kan hlawhtlin chuan kan hlim ṭhîn.

¹³Thurâwn hmusittu chuan a chhiat phah ang a, Thupêk zâwmtu chu a him ang.

¹⁴Mi fing zirtîrna chu nunna hnâr a ni a, Thihna thang pumpelhna a ni.

¹⁵Finna ṭha chuan mi a timawi a, Rinawm lohna erawh chu boralna a ni.

¹⁶Mi fing chuan fîmkhur takin engkim a ti a, Mi mâwl erawh chuan a âtzia a târlang ṭhîn.

¹⁷Mi tirh rinawm loten buaina an tichhuak a, Palai rinawmten remna an thlen.

¹⁸Kaihhruai duh lotu chu a pachhiain a mualpho vang a. Zilhna zâwmtu chu chawimawi a ni ang.

¹⁹Duhthusâm hlawhtlin hi nuam tak a ni, Mi sualte chuan thil sual an hawisan duh tlat lo.

²⁰Mi fing kâwm la, i fing ve ang; Mi mâwl i kawmngeih chuan i tuar ngei ang.

²¹Mi sualte chu mangannain a tlâkbuak ṭhîn a, Mi dikte erawh chuan thil ṭha an dawng ngei ang.

²²Mi ṭha chuan a tute thlenga rochun tûr sum a hnutchhiah a, Mi sual sum khâwl erawh chu mi dikten an nei ang.

²³Mi retheite tân buh thar ṭeuhna tûr ram a awm diai duai a, Mahse, mi dik loten an neih an phal si lo.

²⁴Talhfiak hmang lo chuan a fa a hua a ni, A hmangaih chuan tuk tin zilh rawh se.

²⁵Mi dikte chuan kham tâwk ei tûr an nei ang a, Mi sualte chu an ril a ṭâm fo vang.