Read Mizo Lushai Thufingte 14 Bible Online

Thufingte 14 - Mizo Lushai bible

Thufingte 14

¹Hmeichhe fing chuan chhûngkua an din a, A â-te chuan an kut ngeiin an ṭhiat.

²Ngîl taka nung chuan LALPA a ṭih a ni; Kawi taka awm chuan a hmusit a ni.

³Mi â chu chapo takin a ṭawng ṭhîn a, Mi fing chu a thuin a hum ṭhîn.

⁴Bâwng chhawr tûr a awm loh chuan buh in a ruak a, Bâwng tha chhawr avângin buh a hlâwk ṭhîn.

⁵Thuhretu rinawm chuan dâwt a sawi ngai lo va, A rinawm loh erawh chuan dâwt a phuahchawp ṭhîn.

⁶Mi inchhuangte chu an fing ngai lo vang a, Mi rilru nei rên râwnte chuan thil an hre thuai ṭhîn.

⁷Mi â chu kalsan vat rawh, Eng mah hrilh tûr che a nei lo.

⁸Mahni nihna hriat hi mi fing finna chu a ni a, Mi â âtna chu finga a inhriatna hi a ni.

⁹Pathianin mi â-te a hmusit a, Mi ngilneite erawh chu a duhsak ṭhîn.

¹⁰Kan lungngaihna chu mahni chauhvin kan hria, Kan lâwmna pawh mi dangin min ṭâwmpui thei lo.

¹¹Mi sual chhûngkua an tlûkchhiat pawhin, Mi ṭha chhûngkua chu an dingchang ang.

¹²Kawng dik nia i hriat chu Thihna a la ni mai thei.

¹³Nuih lai pawhin thinlung a na ṭhîn a, Lâwmna chu lungngaihnain a zui fo ṭhîn.

¹⁴Mi sualte chuan an sual man an hmu ang a, Mi ṭhate chuan an thiltih lâwmman an dawng bawk ang.

¹⁵Mi sualte chuan eng pawh an ring mai a, Mi fîmkhur chuan a kalna tûr a thlîr ngun ṭhîn.

¹⁶Mi fingte chu an fîmkhur a, Thil ṭha lo an hawisan a, Mi sualte erawh chuan ngampa takin thil an ti buan buan ṭhîn.

¹⁷Thinchhiate chuan â takin thil an ti rum rum ṭhîn a, Mi fîmkhurte chu an hua.

¹⁸Mi mâwlte chuan an mâwl man an hmu a, Mi fingte chuan hriatna an dawn belh ṭhîn.

¹⁹Mi sualte chu mi ṭha hmaah an kûn ang a, Mi dikte hmaah chuan an ṭhingṭhi ang.

²⁰Pachhiate chu an ṭhenawmte pawhin an hua a, Hausate erawh chuan ṭhian an ngah hle.

²¹Ṭhenawmte hmusittu chu mi sual a ni a, Retheite lainattu chu mi nihlawh a ni.

²²Thil ṭha lo ngaihtuahtu chuan thil sual a ti a ni; Thil ṭha tih tumtute chu miin an ring ang a, an lainat ang.

²³Thawhrim chuan rah a nei ṭhîn a, A sawia sawi ringawt chuan tlâkchhamna a thlen.

²⁴Mi fingte chu hausakna vûr an ni a, Mi sualte âtzia chu chhah tak a ni.

²⁵Thuhretu dik chuan mi nun a chhan ṭhîn a, Dâwt a sawi chuan mi a phat ṭhîn a ni.

²⁶ LALPA ṭih hi him taka awmna a ni a, Fate tân pawh belh tlâk a ni.

²⁷ LALPA ṭih hi nunna hnâr a ni a, Thihna thang pumpelhna a ni.

²⁸Lalin khualehtui a ngah chuan a ropui a, Mi a neih loh chuan a chan a chau ta ṭhîn a ni.

²⁹Mi thinnel chuan thil a hrethiam ṭhîn a, Mi thinram chuan a âtzia a tilang ṭhîn.

³⁰Thlamuanna hian taksa a tihrisêl a, Îtsîkna hi ngalngêt ang a ni.

³¹Retheite nêkchêp hi siamtu hmuhsitna a ni; Pachhiate lainattu chuan a chawimawi a ni.

³²Mi sualin a thil sual tih a chhiat phah a, Mi dik chu a diknain a hum zâwk ṭhîn.

³³Mi rilru nei rên râwn chu an fing ṭhîn a, Mi sualte erawh chuan thufing an hre thei lo.

³⁴Dikna chuan hnam a tiropui a, Sual hi hnam tin tân mualphona a ni.

³⁵Chhiahhlawh fing chu lalin a duhsak ṭhîn a, A mit tlung lo chungah a thinur ṭhîn.