Read Mizo Lushai Thufingte 15 Bible Online

Thufingte 15 - Mizo Lushai bible

Thufingte 15

¹Chhânna nêmin thinrim a tireh a, Aw vînin thinur a titho.

²Mi fing thu sawi chuan hriatna a tiduhawm a, Mi mâwlten thu â an phuh chhuak ṭhîn.

³ LALPAN hmun tin a hmu a, Mi sual leh mi ṭha a thlîr kim vek a ni.

⁴Aw dam chuan mi a tiharh a, Thu veivir chuan mi a tingui.

⁵Mi â chuan a pa kaihhruaina a hmusit a, Mi fing chuan a pa zirtîrna a pawisa ṭhîn.

⁶Mi dik inah sum leh pai a tling khâwm a, Buaina a lo thlenin mi sualte an chhe mai ṭhîn.

⁷Hriatna hi mi fingten an tidarh a, Mi mâwlte erawh chuan an ti ve lo.

⁸ LALPAN mi sualte inthawina chu a ten a, Mi ngîlte ṭawngṭaina chu a lawmzâwng tak a ni.

⁹ LALPAN mi sualte awm dân chu a ten a, Dik taka thiltite chu a ngaina ṭhîn.

¹⁰Kawng dik pênsantu chu na taka hrem a ni ang a, Zirtîrna hawtu chu a thi ngei ang.

¹¹Seol leh boralna hmun chu LALPAN a hmu tlang vek a, Mihring thinlung phei chu a va hmu chiang dâwn êm!

¹²Chapote chuan kaihhruai an duh lo va, Mi fing an pan duh bawk hek lo.

¹³Thinlung hlim chu hmêlah a lang a, Thinlung ngui chuan rilru a tichau.

¹⁴Mi fingte chuan hriat belh an duh a, Mi mâwlte chuan mâwl renga awm an duh tâwk.

¹⁵Rethei nun chu hahthlâk tak a ni, Mi hlim thei chuan nuam an ti ang.

¹⁶Buai phîlîa neih ṭeuh ai chuan, Tlêm tê chauh pawh neiha LALPA ṭih hi a ṭha.

¹⁷Inhaw chunga sa tui tak tak ei ai chuan, Hmangaihte nên anhnah mai mai ei pawh a nuam.

¹⁸Mi thinramin buaina an chawk chhuak a, Mi thinnelin buaina an tidai ṭhîn.

¹⁹Thatchhe kawng chu hlîngin a khat a, Mi ngîlte kawng chu a fai hliau ṭhîn.

²⁰Fapa fing chuan a pa a tilâwm a, A â erawh chuan a nu a hmusit ṭhîn.

²¹Mi mâwlte chuan an ât an hlimpui a, Mi fingte erawh chu kawng ngîlah an kal ṭhîn.

²²Remruat lâwk a nih loh chuan thiltum a tlawlh ṭhîn a, Remhria an tam erawh chuan a hlawhtling ṭhîn.

²³A hun taka chhânna dik hriat hi, A hlimawmin a va ṭha êm!

²⁴Mi fingte chuan nunna kawng chu an zawh chho va, Seol chhukna kawngah an kal duh lo.

²⁵ LALPAN chapote in a ṭhiatsak a, Hmeithaite ramri chu a humsak ṭhîn.

²⁶ LALPAN mi sualte ngaihtuahna chu a ten a, Mi thianghlimte thu chu a lâwm.

²⁷Dik lo taka hlêp ṭeuh tum chu chhûngkaw buaina a ni a, Thamna lâk duh loh hi nun hlimna a ni.

²⁸Mi dikte chuan an chhân hmain an ngaihtuah ngun ṭhîn a, Mi sualte chuan thu ṭha lo an phuh chhuak pheng phung ṭhîn.

²⁹ LALPA chuan mi sualte a hlat a, Mi dikte ṭawngṭai a ngaithla ṭhîn.

³⁰Hlim hmêlin mi a tilâwm a, Thu lâwmawmin mi a tiharh.

³¹Zilhna pawisak hi mi fing zînga telvena a ni.

³²Kaihhruaina pawisa lo chu mahni intichhia a ni a, Zilhna pawisak hi finna a ni.

³³ LALPA ṭih hi fin zirna a ni a, Chawimawina hlawh hmain tlâwm a ṭûl ṭhîn.