Read Mizo Lushai Thufingte 16 Bible Online

Thufingte 16 - Mizo Lushai bible

Thufingte 16

¹Mihringin rem a ruat a, A hlawhtlinna chu LALPA thu thu a ni.

²Kan awm dân apiang ṭha hlein kan ngai ṭhîn a, Mahse, LALPAN kan thiltum a ni a thlîr ber.

³ LALPA-a innghatin thil ti la, I thiltum chu a tihlawhtling ngei ang.

⁴Tum bîk neiin LALPAN engkim a ti a, Mi sualte pawh chhiat tâwk tûra a siam an ni.

⁵Chapote chu LALPA tenzâwng tak an ni a, Hrem an pumpelh hauh lo vang.

⁶Mi rinawmte chu khawngaihnain an bawhchhiatna ngaihdam a ni a, LALPA ṭih hi thil ṭha lo hawisanna a ni.

⁷ LALPA lawmzâwnga mi a awm chuan, A hmêlmate nên pawh an inrem ṭhîn.

⁸Dik lo taka neih ṭeuh ai chuan Dik taka tlêm tê neih a ṭha.

⁹Mihringin a awm dân tûr a ruahman a, Mahse, amah kaihruaitu chu LALPA a ni.

¹⁰Pathian kaihhruaiin lalin thu a sawi a, A thu rêl chu a sual ngai lo.

¹¹Bûkna dik leh a lung dik chu LALPA lâwmzâwng a ni, Bâwma bûklung zawng zawng hi a siam a ni.

¹²Suahsualna hi lalten an ngaithei lo va, Dikna avâng chauhvin an lalna hi a nghet a ni.

¹³Lalten thu dik sawi an lâwm a, Thu dik sawi ṭhînte chu an ngaina ṭhîn.

¹⁴Lal a thinur chuan mi a that mai thei a, Mahse, mi fing chuan a thlêm dai thei.

¹⁵Lal hmêl a hlim chuan nun a nuam a, A duhsakna chu ṭhâl chhûm ruah pai ang hi a ni.

¹⁶Finna hi rangkachak aiin a hlu a, Hriatna pawh hi tangkarua aiin a thlanawm zâwk.

¹⁷Mi ngîlte chuan sual pumpelhna lamlian an zawh a, Fîmkhur taka kal chuan a nun a humhim ang.

¹⁸Chapona chuan boralna a thlen a, Inchhuanna chuan chhiatna a thlen.

¹⁹Retheite nên tlâwm taka awm hi, Chapote nêna râllâk sum insem aiin a ṭha zâwk.

²⁰Remhre taka thil titu chu a hlawhtling ṭhîn a, Mahse, LALPA-a innghah chu a hlu zâwk.

²¹Mi fing chu thil hrethiam an ti ang a, Ṭawngkam thlum chu awih a nahawm ṭhîn.

²²Finna neih hi nunna hnâr a ni a, Mi sual zirtîr tum chu a âtthlâk e.

²³Ngun taka ngaihtuahin mi fing chuan thu a sawi a, A sawi chu a awihawm bîk ṭhîn.

²⁴Ṭawngkam thlum chu a thlâra khawizu ang hi a ni, Mi a tilâwmin a tihahdam ṭhîn.

²⁵Kawng dik nia i hriat chu, Thihna kawng a la ni mai thei.

²⁶Mi an ṭâm chuan hna an thawk nasa a, An ril a ṭâm loh nâna thawk an ni.

²⁷Mi sual chuan thil ṭha lo a ngaihtuah chhuak a, A thu chhâk chhuah pawh mei sa ang hi a ni.

²⁸Mi kawi chuan innghirnghona a tichhuak a, Se sea thu lâk chîng chuan ṭhian ṭha a tiṭhen ṭhîn.

²⁹Mi nunrâwngten an ṭhiante an bum a, Kawng dik lovah an hruai daih ṭhîn.

³⁰Mit siaitu chuan thil ṭha lo a ngaihtuah a, Heh pettu chuan thil ṭha lo a ti dâwn a ni.

³¹Lu ṭuak hi lallukhum mawi tak ang a ni. Mi dikte chuan an nei ngei ang.

³²Mi thinnel chu pasalṭha aiin a duhawm a, Khawpui hnehtu nih ai chuan mahni inhneh a ṭha zâwk.

³³Chinchâng hriat nân ṭhum an vâwr ṭhîn a. Mahse, thu titâwptu chu LALPA a ni.