Read Mizo Lushai Thufingte 18 Bible Online

Thufingte 18 - Mizo Lushai bible

Thufingte 18

¹Mal tlat chîng chuan amaduhzâwng chauh a ngaihtuah a, Mi dang a thurualpui thei lo.

²Mi â chuan hriatna a ngaina lo va, A ngaih dân chauh sawi a duh ṭhîn.

³Sual chu mualphonain a rawn zui a, Hmingchhiate chu hmuhsit zui an ni bawk.

⁴Kan thuchhuak chu lui luang ang hi a ni a, Finna tuikhur erawh chu thûk tak a ni.

⁵Mi dik chan tûr lâksaka, Mi sual duhsak a ṭha lo ve.

⁶Mi â ṭawng chuan inhnialna a tichhuak a, A thu chuan invuak a chawh a ni.

⁷Mi â chuan a thu a chhiat phah a, A inṭawngâwk tlat ṭhîn.

⁸Mi rêl ser ser hi thil tui tak ang a ni, Tui kan va ti ṭhîn êm!

⁹Mahni hnaa dâwngdah chîng chu Tichhetua unaupa a ni.

¹⁰ LALPA hming chu kulhpui ang a ni a, Mi dikte an tlân lût a, an him ṭhîn.

¹¹Mi hausa tân a hausakna chu kulhpui ang a ni a, Lung bang sâng tak angin a ngai.

¹²Chapona chu chhiatnain a zui a, Ropui hmain tlâwm a ṭûl ṭhîn.

¹³Ngaihthlâk hmaa chhân chu, A âtthlâkin a zahthlâk ṭhîn.

¹⁴Dam loh pawhin dam duhna hian beisei min neihtîr a, Dam duhna a bo tawh chuan tu nge dam thei ang?

¹⁵Rilru nei rên râwnten hriatna an neih belh a, Mi fingte chuan hriatna an ngaihven ṭhîn.

¹⁶Thilpêkin kawng a tikaw thei a, Milian hmaah pawh awlsam taka luh theihna a ni.

¹⁷Thubuai sawi hmasatu chu thiam hlein a lang ṭhîn, A rawn chhâl lêt an awm hma chu.

¹⁸Milian an inkhin chuan ṭhum vâwr ila, Ṭhen theih an ni.

¹⁹I unau ṭanpui la, kulhpui angin a hum ang che, In inhau erawh chuan kawng a kalh hnan ang che.

²⁰I thu sawi avângin i puar ang a, I thu azirin i tlai ang.

²¹Nunna emaw, thihna emaw a hring thei a, I thu sawi mawh chu i phur ngei ang.

²²Nupui zawng hmu chuan thil ṭha tak a hmu a ni, LALPA duhsakna a dawng ang.

²³Mi rethei chuan khawngaih thla la takin thu a sawi ṭhîn a, Mi hausa erawh chu a ṭawng chaltlai hle ṭhîn.

²⁴Ṭhian ṭha ni âwm taka lang an awm a, Unau aia ṭhian nghet an awm bawk ṭhîn.