Read Mizo Lushai Thufingte 19 Bible Online

Thufingte 19 - Mizo Lushai bible

Thufingte 19

¹Mi â dawthei tak nih ai chuan, Mi rethei, ngîl taka nung nih a ṭha zâwk.

²Hriatna nei si lova phûr viau hi a ṭha lo ve, Hmanhmawh chuan a dai sual ṭhîn.

³Mi ṭhenkhatin an ât an chhiat phah a, LALPA an dem leh si.

⁴Hausak hi ṭhian ngahna a ni a, Retheihna hian ṭhian a tiṭhen.

⁵Thuhretu der chu hrem a ni ang a, Dâwt sawi chuan hrem a pumpelh lo vang.

⁶Milian tlawntu an tam hle a, Mi thilphalten ṭhian an ngah ṭhîn.

⁷Mi rethei chu a unau zawng zawng pawhin an nin chuan, Ṭhian a nei zo lo pawh a mak lo ve. Neih tum chiam mah se, a hmu zo lo vang.

⁸Finna neih tum hi mahni induhsakna a ni a, Hriatna ngaihlu chuan a ṭhatpui ang.

⁹Thuhretu der chu hrem a ni ang a, Mi dawthei chu a boral ngei ngei ang.

¹⁰Sâng taka khawsak hi mi â tân a mawi lo va, Chhiahhlawh tân milian chunga thuneih a âwm hek lo.

¹¹Mi fing chu a thinur duh lo va, Chêksawlhna a haider hi amah tiropuitu a ni.

¹²Lal thinrim chu sakeibaknei rûm ang hi a ni a, A duhsakna erawh chu hnim chunga dai tla ang hi a ni.

¹³Fapa â chu a pa tân chhiatna a ni a, Nupui âncheh chu in chung far reng ang hi a ni.

¹⁴In leh lote hi pate ta kan rochun a ni a, Nupui fing erawh chu LALPA min pêk a ni.

¹⁵Mi thatchhia chuan mut an duh a, Mi dâwngdah chu a ṭâm ngei ang.

¹⁶Thupêk zawm hi mahni inhumhimna a ni a, Thu awih lo chu a thi ngei ang.

¹⁷Rethei khawngaih hi LALPA hnêna thil pûktîr ang a ni, I thiltih ang chu a rûl leh ngei ang che.

¹⁸Beiseiawm a la nih laiin i fa chu thunun rawh, Chutilo chu, a chhiat i duh tihna a ni.

¹⁹Mi thinchhia chuan a thinchhiat rah a seng ang a, Chhan ṭhîn mah la, chhan leh ṭhin a ṭûl ang.

²⁰Thurâwn ngaithla la, kaihhruaina zâwm rawh. Engtikah emaw chuan i la fing ang.

²¹Mihringin thil tam tak an ruahman a; Mahse, LALPA remruat chauh a dingchang ang.

²²Mihring hi rinawm taka awm tûr a ni, Dâwttheih ai chuan retheih a ṭha.

²³ LALPA ṭih hi nunna a ni a, A lungawithlâk a, Thil ṭha lovin a tlâkbuak lo vang.

²⁴Mi thatchhia chuan thlêng zen chu a peih a, Mahse, a bâr peih lo.

²⁵Pawisak nei lo chu vua la, mi mâwlin a fin phah ang. Mi fing zilh la, hriatna a ngah sawt ang.

²⁶Pate rawka nute hnawtchhuaktu chu, Fa zahpuiawm, mualphona tâwpkhâwk thlentu a ni.

²⁷Ka fapa, thununna i zir zawm loh chuan, I hriat sa pawh i theihnghilh mai ang.

²⁸Thuhretu sual chuan dik taka rorêl a ngainêp a, Mi sualte chuan dik lohna hi an duhzâwng tak a ni.

²⁹Pawisak nei lote chu thiam loh chang sa an ni a, Mi â-te chu an hnungzânga vuak tûr an ni.